मुंबईत रस्त्यावर भीक मागताना आढळला 'भावी डॉक्टर'; मालाड पोलिसांमुळे दीड महिन्यानंतर कुटुंबाशी भावनिक भेट

शिक्षकी पेशात असलेले वडील, सरकारी रुग्णालयात डॉक्टर असलेला मोठा भाऊ आणि स्वतः होमिओपॅथीच्या (BHMS) तिसऱ्या वर्षात शिकणारा हुशार तरुण; अशा एका सुशिक्षित आणि प्रतिष्ठित कुटुंबातील २५ वर्षीय मुलगा अचानक मुंबईच्या रस्त्यावर भीक मागताना आढळल्याची एक अत्यंत हृदयद्रावक आणि धक्कादायक घटना समोर आली आहे. मात्र, मालाड पोलिसांच्या सतर्कतेमुळे आणि संवेदनशीलतेमुळे या तरुणाची सुखरूप सुटका झाली असून, तो पुन्हा आपल्या कुटुंबाच्या सुरक्षित छायेत परतला आहे.

अभय सुरेश बेळकोनी असे या २५ वर्षीय तरुणाचे नाव असून तो नांदेड जिल्ह्यातील तामसा गावचा रहिवासी आहे. अभय अभ्यासात प्रचंड हुशार असून त्याला बारावीत ८० टक्के गुण मिळाले होते. मात्र, काही महिन्यांपूर्वी तो मानसिक तणावाखाली होता. सुमारे दीड ते दोन महिन्यांपूर्वी तो अचानक घरातून कोणालाही न सांगता बाहेर पडला. ट्रेनने प्रवास करत तो आधी इंदूरला गेला आणि तिथून पुन्हा मुंबईत आला. या प्रवासादरम्यान त्याची शैक्षणिक कागदपत्रे, पैसे आणि मोबाईल असलेली बॅग चोरीला गेली. बॅगेतच घरातील सदस्यांचे संपर्क क्रमांक असल्याने तो प्रचंड घाबरला आणि त्या धक्क्यातून त्याची मानसिक स्थिती अधिकच खालावली. मुंबईत पोहोचल्यावर पोटाची खळगी भरण्यासाठी आणि गावी जाण्यासाठी पैसे जमा करण्याकरिता तो रेल्वे प्लॅटफॉर्म, बसस्टॉप आणि मंदिराबाहेर फिरू लागला. शेवटी त्याच्यावर रस्त्यावर भीक मागण्याची वेळ आली.

मुंबईत भिक्षेकऱ्यांविरोधात सुरू असलेल्या एका नियमित मोहिमेदरम्यान, मालाड येथील एस. व्ही. रोड परिसरात पहाटेच्या वेळी बीट मार्शल अंमलदार कोमलसिंग जाधव यांना एक तरुण अत्यंत थकलेल्या, मळक्या कपड्यात आणि विस्कटलेल्या अवस्थेत भीक मागताना दिसला. संशय आल्याने पोलिसांनी याची आपुलकीने चौकशी केली असता, "मला गावी जायचे आहे आणि त्यासाठी पैसे गोळा करण्यासाठी मी गेल्या तीन दिवसांपासून भीक मागतोय," असे त्याने सांगितले.

त्याची दयनीय अवस्था आणि मानसिक स्थिती ठीक नसल्याचे ओळखून पोलिसांनी त्याला पोलीस ठाण्यात आणले. तिथे त्याला अंघोळ घालून, नवीन कपडे आणि प्रेमाने खाऊपिऊ देऊन विश्वासात घेण्यात आले. त्यानंतर पोलीस उपनिरीक्षक मनीषा कागलकर यांनी त्याच्याशी मायेने संवाद साधला. हळूहळू अभयने त्याचे नाव आणि गाव तामसा (नांदेड) असल्याचे सांगितले.

या माहितीच्या आधारे मालाड पोलीस ठाण्याचे वरिष्ठ पोलीस निरीक्षक दुष्यंत चव्हाण यांच्या मार्गदर्शनाखाली पोलिसांनी तातडीने नांदेडच्या तामसा पोलिसांशी संपर्क साधला. तिथून समजले की कुटुंबाने अभय हरवल्याची तक्रार आधीच नोंदवली होती. अभय मुंबईत सुखरूप असल्याची माहिती मिळताच त्याचे शिक्षक असलेले वडील तातडीने मुंबईत दाखल झाले.

पोलीस ठाण्यात मळक्या कपड्यात आणि अशा अवस्थेत असलेल्या आपल्या पोटच्या मुलाला पाहताच वडिलांच्या डोळ्यांतून अश्रू वाहू लागले. त्यांनी धावत जाऊन अभयला घट्ट मिठी मारली. हा बाप-लेकाचा भावनिक मेळावा पाहून उपस्थितांचेही डोळे पाणावले. योग्य वेळी मदत करून मुलाचे आयुष्य उद्ध्वस्त होण्यापासून वाचवल्याबद्दल या सुशिक्षित कुटुंबाने मुंबई पोलिसांचे मनापासून आभार मानले आहेत.