Nagpur : नागपुरात पोलीस बीट मार्शलवर विटेने हल्ला; जखमी अवस्थेतही आरोपीचा पाठलाग, धाडसाचे सर्वत्र कौतुक

Nagpur : शहरातील पांचपावली पोलीस ठाणे हद्दीत गस्तीदरम्यान पोलिस बीट मार्शलवर विटेने हल्ला झाल्याची धक्कादायक घटना उघडकीस आली आहे. या हल्ल्यात पोलीस कर्मचारी आनंद सिंह जखमी झाले. मात्र, जखमी अवस्थेतही त्यांनी दाखवलेल्या धाडसामुळे एका आरोपीला ताब्यात घेण्यात पोलिसांना यश आले आहे. इतर दोन आरोपींचा शोध सुरू आहे.

मिळालेल्या माहितीनुसार, बीट मार्शल आनंद सिंह हे नेहमीप्रमाणे रात्री गस्त घालत होते. यावेळी राणी दुर्गावती चौकाजवळ एका ट्रकच्या आडोशाला अंधारात तीन संशयित युवक बसलेले त्यांना दिसले. संशय आल्याने त्यांनी तात्काळ त्या युवकांकडे जाऊन चौकशी सुरू केली. पोलिसांना पाहताच दोन युवकांनी घटनास्थळावरून पळ काढला.

दरम्यान, तिसऱ्या युवकाला पकडण्याचा प्रयत्न करत असताना त्याने अचानक वीट उचलून आनंद सिंह यांच्या दिशेने फेकली. या हल्ल्यात ते जखमी झाले, तरीही त्यांनी हार न मानता आरोपीचा पाठलाग सुरू ठेवला.

घटनेची माहिती मिळताच पांचपावली पोलिसांनी तत्काळ घटनास्थळी धाव घेत शोधमोहीम राबवली. वरिष्ठ पोलीस निरीक्षक बाबूराव राऊत यांच्या मार्गदर्शनाखाली पोलिसांनी जलद कारवाई करत एका आरोपीला ताब्यात घेतले. इतर दोन आरोपींचा शोध सुरू आहे.

या प्रकरणातील आरोपींमध्ये नूर आलम, राजू टकल्या (प्रवेश नगर) आणि रवि हुमे (यशोधरा नगर) यांचा समावेश आहे.

दरम्यान, जखमी आनंद सिंह यांना तातडीने उपचारासाठी रुग्णालयात दाखल करण्यात आले असून त्यांची प्रकृती स्थिर असल्याचे सांगण्यात आले. त्यांच्या धाडसाचे आणि कर्तव्यनिष्ठेचे वरिष्ठांकडून कौतुक करण्यात येत आहे. या घटनेमुळे परिसरात काही काळ तणावाचे वातावरण निर्माण झाले होते.