Pune : पुणेकरांसाठी मोठा दिलासा! मेट्रो लाईन-३ चा पहिला टप्पा लवकरच सुरू; दोन्ही मेट्रो सेवांमध्ये एकाच तिकिटावर प्रवास शक्य

Pune : पुणे महानगर प्रदेश विकास प्राधिकरण (पीएमआरडीए) यांच्या मेट्रो लाईन-३ चा पहिला टप्पा पुढील महिन्यात सुरू होण्याची शक्यता आहे. या प्रकल्पामुळे शहरातील प्रवाशांना मोठा दिलासा मिळणार असून, मेट्रो-३ आणि महामेट्रोच्या सेवांमध्ये एकाच तिकीटावर प्रवास करण्याची सुविधा उपलब्ध होणार आहे. यासाठी आवश्यक असलेली एकत्रित तिकीट प्रणाली अंतिम टप्प्यात असून, हिंजवडी–शिवाजीनगर मेट्रो सुरू होण्यापूर्वीच ती पूर्ण करण्याचे नियोजन आहे.

सध्या महामेट्रोकडून वनाझ ते रामवाडी आणि पिंपरी ते स्वारगेट या मार्गांवर मेट्रो सेवा सुरू आहे. दरम्यान, हिंजवडी ते शिवाजीनगर या मेट्रो मार्गाचे काम अंतिम टप्प्यात पोहोचले असून, मे महिन्यात पहिल्या १२ किलोमीटरचा टप्पा सुरू करण्याचा मानस आहे. मुख्यमंत्री देवेंद्र फडणवीस यांनी यासंदर्भात संबंधित यंत्रणांना आवश्यक सूचना दिल्या आहेत.

ही नवीन मेट्रो सेवा जिल्हा न्यायालय स्थानकाशी जोडली जाणार असून, त्यासाठी पादचारी पुलाचे काम सुरू आहे. प्रवाशांना दोन्ही मेट्रो सेवांचा अखंड प्रवास अनुभवता यावा यासाठी एकच तिकीट प्रणाली लागू केली जाणार आहे. यासंदर्भात महामेट्रो आणि पुणे मेट्रोच्या अधिकाऱ्यांमध्ये अनेक बैठकांचे आयोजन करण्यात आले असून, मेट्रो कार्डदेखील दोन्ही सेवांसाठी वापरता येणार आहे. ‘वन पुणे कार्ड’द्वारे प्रवास सुलभ करण्याचे प्रयत्नही सुरू आहेत.

याशिवाय, पुणे, पिंपरी-चिंचवड आणि पीएमआरडीए हद्दीतील प्रवाशांना मेट्रो आणि बस सेवांसाठी एकाच कार्डवर प्रवास करता यावा, यासाठीही पावले उचलली जात आहेत. या अनुषंगाने महामेट्रो आणि पुणे महानगर परिवहन महामंडळ (पीएमपीएमएल) यांच्या अधिकाऱ्यांमध्येही चर्चा सुरू आहे.