पुणे: श्रीमंत दगडूशेठ हलवाई सार्वजनिक गणपती ट्रस्टच्या अध्यक्षपदी महेश सूर्यवंशी यांची एकमुखी निवड! २०२६ ते २०३१ साठी स्वीकारली धुरा

पुणे: पुण्यातील अत्यंत प्रसिद्ध आणि जगभरात आराध्य दैवत मानल्या जाणाऱ्या श्रीमंत दगडूशेठ हलवाई सार्वजनिक गणपती ट्रस्टच्या अध्यक्षपदी महेश सूर्यवंशी यांची सर्वानुमते आणि एकमुखी निवड करण्यात आली आहे. २०२६ ते २०३१ या पाच वर्षांच्या नवीन पदाधिकाऱ्यांच्या कार्यकाळासाठी ही महत्त्वाची निवड पार पडली आहे. सोमवारी झालेल्या ट्रस्टच्या विश्वस्तांच्या महत्त्वपूर्ण बैठकीत हा निर्णय घेण्यात आला असून, पुणे शहरासह धार्मिक वर्तुळातून त्यांच्यावर अभिनंदनाचा वर्षाव होत आहे.

विश्वस्तांच्या बैठकीत ठरली नवीन पदाधिकाऱ्यांची रचना: श्रीमंत दगडूशेठ हलवाई सार्वजनिक गणपती ट्रस्टच्या विश्वस्तांची एक उच्चस्तरीय बैठक नुकतीच पार पडली. या बैठकीत आगामी पाच वर्षांच्या कालावधीसाठी (२०२६-२०३१) ट्रस्टची धुरा कोणाकडे सोपवावी, याबाबत सर्वानुमते चर्चा झाली. या बैठकीत एकमताने निर्णय घेत महेश सूर्यवंशी यांच्याकडे अध्यक्षपदाची धुरा सोपवण्यात आली.

याआधीच्या ठरलेल्या नियोजनानुसार, २०२२ ते २०२४ या काळात माणिक चव्हाण यांनी अध्यक्षपद भूषवले होते, तर त्यानंतर २०२४ ते २०२६ या कालावधीत सुनील रासणे यांनी अध्यक्ष म्हणून यशस्वी कार्यभार सांभाळला होता. आता २०२६ ते २०३१ या ५ वर्षांच्या महत्त्वाच्या कालावधीसाठी महेश सूर्यवंशी ट्रस्टचे अध्यक्ष म्हणून नेतृत्व करणार आहेत. विशेष म्हणजे, या नवीन रचनेमध्येमाजी अध्यक्ष सुनील रासणे यांच्याकडे आता 'विश्वस्त व कोषाध्यक्ष' पदाची जबाबदारी सोपवण्यात आली आहे. तसेच, आगामी २०२३१ ते २०३६ या पुढील कालावधीसाठी हेमंत रासणे हे अध्यक्षपदाची धुरा स्वीकारणार आहेत, असेही या बैठकीत निश्चित करण्यात आले.

महेश सूर्यवंशी यांचे सामाजिक व धार्मिक योगदान: महेश सूर्यवंशी हे यापूर्वी ट्रस्टमध्ये कोषाध्यक्ष म्हणून कार्यरत होते आणि त्यांनी उत्सव काळात तसेच वर्षभर राबवण्यात येणाऱ्या विविध सामाजिक, सांस्कृतिक व धार्मिक उपक्रमांमध्ये अत्यंत महत्त्वाची भूमिका बजावली आहे. दगडूशेठ गणपती ट्रस्टतर्फे आयोजित करण्यात येणारा गणेशोत्सव, आरास, समाजोपयोगी उपक्रम आणि विविध मंदिरांचे निर्माणकार्य यामध्ये त्यांचा सक्रीय सहभाग असतो. त्यांच्या या अनुभवाचा आणि कुशल नेतृत्वाचा फायदा आगामी काळात ट्रस्टच्या सामाजिक व धार्मिक कार्याला अधिक विस्तारण्यासाठी होईल, असा विश्वास विश्वस्तांनी व्यक्त केला आहे. निवडीची घोषणा झाल्यानंतर पुणे शहरातील विविध राजकीय, सामाजिक आणि धार्मिक क्षेत्रातील मान्यवरांनी महेश सूर्यवंशी यांची प्रत्यक्ष भेट घेऊन त्यांचे पुष्पगुच्छ देऊन अभिनंदन केले आहे.