केतन अग्रवाल हत्या प्रकरण: सिया आणि चेतनच्या कटात आणखी एकाचा सहभाग? पोलिसांची तपासाची नवी दिशा!

पुणे: केतन अग्रवाल हत्या प्रकरण: सिया-चेतनच्या कटात तिसऱ्या व्यक्तीचा सहभाग? पोलिसांकडून कसून तपास सुरू पुण्यातील खळबळजनक केतन अग्रवाल हत्या प्रकरणात आता एक नवीन वळण आले आहे. या प्रकरणात मुख्य आरोपी सिया गोयल आणि तिचा प्रियकर चेतन चौधरी यांना पोलिसांनी अटक केली असली, तरी या कटात आणखी एका व्यक्तीचा सहभाग असावा, असा संशय लोणावळा पोलिसांना आहे.

तपासाची व्याप्ती वाढली: सध्या सिया आणि चेतन हे पोलिस कोठडीत आहेत. त्यांच्या कोठडीचा कालावधी संपण्यापूर्वीच पोलिस या नवीन कोनातून तपास करत आहेत. यापूर्वी या हत्येच्या कटात सियाचा भाऊ साहिल, वडील प्रवीण आणि आई पूजा यांची सखोल चौकशी करण्यात आली आहे. तसेच, सिया आणि केतन यांचे लग्न ठरवून देणाऱ्या मित्तल दाम्पत्याचेही जबाब नोंदवण्यात आले आहेत. बालीला प्री-वेडिंग शूटसाठी जाताना मुंबई विमानतळापर्यंत सोडणाऱ्या कॅब ड्रायव्हरकडूनही घटनेचा घटनाक्रम समजून घेण्यात आला आहे.

पोलिसांची संशयाची सुई कोणाकडे? पोलिसांनी सियाच्या घरी जाऊन पंचनामा केला आहे. हत्या झाली त्या लोहगड किल्ल्यावरील ठिकाणाचे 'सीन रिक्रिएशन' (Scene Re-creation) करून तपास यंत्रणा पुराव्यांची जुळवाजुळव करत आहे. सिया आणि चेतन यांनी हे कृत्य एकट्याने केले की त्यांना कोणाची मदत मिळाली, याचा शोध पोलिस घेत आहेत. पुरावे नष्ट करण्याचा प्रयत्न झाला आहे का, या दिशेनेही तपास सुरू आहे. आता उरलेल्या पोलिस कोठडीच्या काळात तिसऱ्या संशयित व्यक्तीचा शोध घेणे हे पोलिसांसमोर मोठे आव्हान आहे.