अमरावती: समृद्धी महामार्गावर भीषण थरार! धामणगाव रेल्वे परिसरात टायर फुटल्याने ट्रकला अचानक लागली भीषण आग; चालकाचा जिवंत जळून मृत्यू, तर दुसऱ्याचा पुलावरून खाली पडून अंत

अमरावती : हिंदुहृदयसम्राट बाळासाहेब ठाकरे समृद्धी महामार्गावर अपघातांची मालिका सुरूच असून सोमवारी पहाटे भीषण अपघातात दोन व्यक्तींचा मृत्यू झाला. ट्रकचा टायर फुटून वाहनाला आग लागली, ज्यामुळे चालकाचा होरपळून मृत्यू झाला, तर एका व्यक्तीचा पुलाखाली पडून अंत झाला. मात्र क्लिनरने उडी मारून जीव वाचवला.

वाहनाने घेतला पेट

प्राप्त माहितीनुसार, आर जे-११/ जीसी-७३८३ क्रमांकाचा ट्रक नाशिकहून पटणाकडे पत्ताकोबी घेऊन जात होता. पहाटे पाचच्या सुमारास चॅनेल नंबर १२७ ३०० वर गाडीचा ड्रायव्हर साईडचा टायर फुटला आणि वाहनाचे नियंत्रण सुटले. त्यामुळे ट्रक क्रॉस बॅरियरला धडकला आणि डिझेल टैंक फुटल्याने त्यामध्ये आग लागली. क्लिनर साहिब सईद खान (१८, रा. राणीआला, खुर्द पलवल, हरियाना) याने उडी मारली ज्यामुळे तो बचावला. मात्र, जाहुल खान अली खान (२५) पुलाखाली पडल्याने मृत्युमुखी पडला. ट्रक ड्रायव्हर इखलास खान शहाबुद्दीन खान (२२) होरपळून मरण पावला.

अग्निशामक दलाने विझवली आग
घटनेची माहिती मिळताच समृद्धी महामार्गावरील नियंत्रण कक्षाने हेडकॉन्स्टेबल संतोष गहरवार आणि वाजिद शेख यांना सूचित केले. पोलिस उपनिरीक्षक सुधीर गावंडे, कुंदन राठोड आणि वीरेंद्र तराळे तातडीने घटनास्थळी दाखल झाले व मदतकार्य सुरू केले. अग्निशामक दलाने आग विझवली. प्रभारी अधिकारी आवटे आणि त्यांचा स्टाफदेखील उपस्थित होता. सहाय्यक पोलिस निरीक्षक किरण औटे यांच्या मार्गदर्शनाखाली प्राथमिक तपास सुरू आहे, ज्यासाठी सुरेश जाधव आणि मनीष कांबळे काम करत आहेत.