पुणेः संतापजनक प्रकार! फ्लॅट खरेदीसाठी आणि माहेरहून पैसे आणण्यासाठी वारंवार तूप-तूप छळ; अखेर विवाहितेने उचलले टोकाचे पाऊल, पतीसह ५ जणांवर गुन्हा दाखल

पुणेः केशवनगर, मुंढवा भागातील 'व्यंकटेश ग्राफिटी' सोसायटीत ३३ वर्षीय विवाहितेने साडीने गळफास लावून आत्महत्या केल्याची धक्कादायक घटना उघडकीस आली आहे. या प्रकरणी मुंढवा पोलिसांनी मृत महिलेच्या पतीसह सासरच्या पाच जणांविरोधात आत्महत्येस प्रवृत्त केल्याप्रकरणी गुन्हा दाखल केला असून, नणंद शैली संजय सकपाळ (वय ३१, रा. ओशिवरा, अंधेरी, मुंबई) हिला मुंबईतून अटक केली आहे.

मिळालेल्या माहितीनुसार, त्रिष्णा बाळकृष्ण निकम (सासरचे नावः त्रिष्णा राहुल सकपाळ, वय ३३) असे आत्महत्या केलेल्या विवाहितेचे नाव आहे. याप्रकरणी तिचे वडील बाळकृष्ण जयराम निकम (वय ७४, रा. मुंढवा) यांनी मुंढवा पोलीस ठाण्यात फिर्याद दिली आहे. फिर्यादीवरून पोलिसांनी पती राहुल संजय सकपाळ, सासू वैशाली संजय सकपाळ, सासरे संजय मनोहर सकपाळ, नणंद शैली संजय सकपाळ आणि आजीसासू शकुंतला साळुंके यांच्याविरोधात भारतीय न्याय संहिता (BNS) २०२३ चे कलम १०८, ८५, ३(५) अन्वये गुन्हा दाखल केला आहे.

छळ, फ्लॅटची मागणी आणि घटस्फोटासाठी दबाव
पोलिसांनी दिलेल्या माहितीनुसार, २०१८ पासून मृत त्रिष्णा हिला सासरच्या मंडळींकडून वारंवार पैशांसाठी, फ्लॅट खरेदी करण्यासाठी तसेच तिच्या वडिलांच्या नावावर असलेला व्यंकटेश ग्राफिटीमधील फ्लॅट नावावर करून देण्यासाठी त्रास दिला जात होता. पती राहुल याचे दुसरे लग्न करायचे असल्याने तिच्यावर घटस्फोट देण्यासाठी वारंवार दबाव आणला जात होता. तसेच नणंदेच्या शिक्षणासाठी घेतलेले कर्ज फेडण्यासाठी माहेरून पैसे आणण्याचा तगादा लावला जात होता. सासरच्यांच्या सततच्या शारीरिक, मानसिक त्रासाला आणि अपमानास्पद वागणुकीला कंटाळून त्रिष्णा हिने २९ सप्टेंबर २०२६ रोजी राहत्या घरात गळफास घेऊन आत्महत्या केली.

घटनास्थळी सुसाईड नोट जप्त
आत्महत्येपूर्वी त्रिष्णा निकम हिने सुसाईड नोट लिहून ठेवली होती. या सुसाईड नोटमध्ये तिने पतीसह सासरच्या सर्व आरोपींच्या त्रासाला कंटाळून आत्महत्या करत असल्याचा आणि तिच्या मृत्यूला तेच जबाबदार असल्याचा स्पष्ट उल्लेख केला आहे. पोलिसांनी घटनास्थळावरून सुसाईड नोट असलेली वही, साडीचे तुकडे, चाकू, पेन, दोन लॅपटॉप आणि सॅमसंग कंपनीचा मोबाईल जप्त केला आहे. मृत महिलेच्या मोबाईलमध्ये आरोपींसोबत झालेल्या संभाषणाचे ऑडिओ रेकॉर्डिंगही पोलिसांना आढळून आले आहे.

नणंदेला ट्रान्झिट रिमांडवर पुण्यात आणले
मुंढवा पोलिसांनी आरोपी नणंद शैली सकपाळ हिला ३ ऑक्टोबर रोजी मुंबईतील अंधेरी येथून अटक केली. अंधेरी रेल्वे मोबाईल कोर्टाकडून तिचा ट्रान्झिट रिमांड मिळवून तिला पुण्यात आणण्यात आले आहे. उर्वरित फरार आरोपींचा शोध घेणे, आर्थिक व्यवहारांचा तपास करणे आणि आरोपींच्या आवाजाचे नमुने घेण्यासाठी शैली सकपाळ हिची ५ दिवसांची पोलीस कोठडी मिळण्याबाबत सहायक पोलीस निरीक्षक शिल्पा निमकर यांनी न्यायालयात रिमांड रिपोर्ट सादर केला आहे. मुंढवा पोलीस या प्रकरणाचा पुढील तपास करत आहेत.