मुंबई: एसटीचा प्रवास आता अधिक स्वच्छ आणि सुरक्षित! बस आणि स्थानकांची दर चार तासांनी होणार सखोल स्वच्छता.

मुंबई: महाराष्ट्राची जीवनवाहिनी असलेल्या 'एसटी' (MSRTC) महामंडळाने प्रवाशांच्या सोयीसाठी आणि स्वच्छतेचा दर्जा उंचावण्यासाठी एक महत्त्वाकांक्षी राज्यव्यापी मोहीम हाती घेतली आहे. 'जागतिक पर्यावरण दिना'चे औचित्य साधून परिवहन मंत्री आणि एसटी महामंडळाचे अध्यक्ष प्रताप सरनाईक यांच्या हस्ते मुंबईतील परळ बसस्थानक येथे या अत्याधुनिक स्वच्छता मोहिमेचा शुभारंभ करण्यात आला.

दर ४ तासांनी स्वच्छता: या मोहिमेअंतर्गत राज्यातील सर्व बसस्थानके, एसटी बसेस, चालक-वाहक विश्रांतीगृहे आणि प्रसाधनगृहे यांची दर चार तासांनी नियमित स्वच्छता केली जाणार आहे.

आधुनिक यंत्रसामग्री: एसटी स्थानके आणि बस परिसराची स्वच्छता करण्यासाठी आता आंतरराष्ट्रीय दर्जाच्या अत्याधुनिक यंत्रसामग्रीचा आणि यांत्रिक स्वच्छता प्रणालीचा (Mechanized Sanitation Systems) वापर करण्यात येणार आहे.

प्लास्टिक पुनर्वापर: या मोहिमेचा एक भाग म्हणून बसस्थानक परिसरातील प्लास्टिक बाटल्या आणि पिशव्यांचे संकलन केले जाईल. हे प्लास्टिक रिसायकलिंगसाठी पाठवून त्यापासून उपयुक्त आणि टिकाऊ वस्तू तयार करण्यात येतील.

नियमित देखरेख: ही केवळ एकदिवसीय मोहीम नसून एक निरंतर प्रक्रिया आहे. वरिष्ठ अधिकाऱ्यांमार्फत या स्वच्छतेच्या दर्जावर नियमित देखरेख ठेवली जाणार असून, प्रवाशांच्या सूचना आणि अभिप्रायांना विशेष प्राधान्य दिले जाणार आहे.

प्रवाशांना दुहेरी दिलासा:एसटी महामंडळाच्या ७८ व्या वर्धापनदिनापासून (१ जून २०२६) प्रवाशांसाठी सर्व बसस्थानकांमधील स्वच्छतागृहे आधीच 'मोफत' करण्यात आली आहेत. त्यानंतर आता ही ४ तासांच्या फरकाने होणारी स्वच्छता मोहीम सुरू झाल्यामुळे प्रवाशांना अधिक स्वच्छ आणि दर्जेदार सुविधा मिळणार आहेत.याशिवाय, पंतप्रधान नरेंद्र मोदी आणि मुख्यमंत्री देवेंद्र फडणवीस यांच्या मार्गदर्शनानुसार, एसटीच्या २५१ आगारांमध्ये ई-बसेससाठी चार्जिंग स्टेशनचे जाळे उभारण्याचे कामही वेगाने सुरू असून, परळ आगारातील नऊ नवीन चार्जिंग केंद्रांचे भूमिपूजनही यावेळी करण्यात आले.