Digital Tsunami: ‘Cockroach Janta Party’ Faces Severe Crackdown; Website, X, and Instagram Accounts Shut Down!

नवी दिल्ली: गेल्या काही दिवसांपासून सोशल मीडियावर अभूतपूर्व लोकप्रियता मिळवलेल्या आणि तुफान चर्चेत असलेल्या 'कॉकरोच जनता पार्टी' (CJP) या उपरोधात्मक (Satirical) डिजिटल मोहिमेवर मोठी कारवाई करण्यात आली आहे. या डिजिटल चळवळीचे अधिकृत एक्स (X - पूर्वीचे ट्विटर) हँडल आणि इन्स्टाग्राम अकाऊंट्स बंद झाल्यानंतर आता या पक्षाची अधिकृत वेबसाईटही बंद करण्यात आल्याची खळबळजनक माहिती समोर आली आहे.

कॉकरोच जनता पार्टीचे संस्थापक अभिजीत दिपके यांनी दिलेल्या माहितीनुसार, त्यांच्यावर आणि त्यांच्या चळवळीवर चहूबाजूंनी मोठा डिजिटल हल्ला (Crackdown) करण्यात आला आहे. त्यांचे वैयक्तिक इन्स्टाग्राम अकाऊंट आणि पक्षाचे कोट्यवधी फॉलोअर्स असलेले इन्स्टाग्राम पेज हॅक झाले आहे. यापूर्वीच केंद्र सरकारच्या सूचनेनंतर गुप्तचर विभागाच्या (IB) अहवालाचा हवाला देत 'एक्स'ने या पक्षाचे अधिकृत हँडल भारतात प्रतिबंधित (Withheld) केले होते. त्यानंतर त्यांनी सुरू केलेले पर्यायी अकाऊंटही काढून टाकण्यात आले आहे, तर आता या संपूर्ण मोहिमेची वेबसाईटही बंद झाली आहे.

अभिजीत दिपके यांनी स्पष्ट केले आहे की, सध्या त्यांच्याकडे त्यांच्या कोणत्याही सोशल मीडिया प्लॅटफॉर्म किंवा डिजिटल माध्यमांचे नियंत्रण उरलेले नाही. त्यामुळे या प्लॅटफॉर्मवरून यापुढे येणाऱ्या कोणत्याही पोस्ट किंवा विधानांना पक्षाचे अधिकृत वक्तव्य समजले जाऊ नये.

काय आहे 'कॉकरोच जनता पार्टी'चा वाद?

सर्वोच्च न्यायालयाच्या एका सुनावणीदरम्यान बेरोजगार तरुण आणि सोशल मीडिया कार्यकर्त्यांवर करण्यात आलेल्या कथित 'झुरळ आणि परजीवी' (Cockroaches & Parasites) या टिप्पणीनंतर तरुणांच्या संतापातून ही डिजिटल मोहीम उपरोधात्मक पद्धतीने सुरू झाली होती. अवघ्या काही दिवसांतच या पेजने इंस्टाग्रामवर कोट्यवधी फॉलोअर्सचा टप्पा ओलांडला होता. मात्र, वाढत्या लोकप्रियतेसोबतच अभिजीत दिपके यांना व्हॉट्सॲपवर जीवे मारण्याच्या धमक्याही आल्या होत्या, ज्यात त्यांना ही मोहीम बंद करण्यासाठी किंवा एका विशिष्ट पक्षात सामील होण्यासाठी दबाव टाकला जात असल्याचे त्यांनी उघड केले होते. आता या डिजिटल स्ट्राईकमुळे सोशल मीडियावरील हे मोठे वादळ सध्यातरी शांत झाले आहे.