IRGC-Trained Terrorist Arrested for Plotting to Kill Donald Trump’s Daughter Ivanka Trump

अमेरिकेचे राष्ट्राध्यक्ष डोनाल्ड ट्रम्प यांची मुलगी इवांका ट्रम्प यांच्या हत्येचा एक खळबळजनक कट सुरक्षा यंत्रणांनी उघडकीस आणला आहे. इराणच्या 'इस्लामिक रिव्होल्यूशनरी गार्ड कॉर्प्स' (IRGC) द्वारे प्रशिक्षित एका अत्यंत धोकादायक दहशतवाद्याने इवांका ट्रम्प यांना ठार मारण्याचा संपूर्ण कट रचला होता. सुरक्षा यंत्रणांनी वेळीच कारवाई करत या दहशतवाद्याला अटक केली असून संभाव्य हल्ला निकामी केला आहे.

सुरक्षा यंत्रणांनी अटक केलेल्या या ३२ वर्षीय दहशतवाद्याचे नाव मोहम्मद बाकेर साद दाऊद अल-सादी असे असून तो एक इराकी नागरिक आहे. तपासादरम्यान समोर आलेल्या माहितीनुसार, सहा वर्षांपूर्वी अमेरिकेच्या ड्रोन हल्ल्यात मारले गेलेले त्याचे गुरू आणि इराणी लष्करी कमांडर कासिम सुलेमानी यांच्या मृत्यूचा बदला घेण्यासाठी अल-सादी हा भयानक कट रचत होता.

सहा वर्षांपूर्वी तत्कालीन राष्ट्राध्यक्ष डोनाल्ड ट्रम्प यांच्या आदेशानुसार, अमेरिकन लष्कराने बगदादमध्ये एक मोठी विशेष कारवाई केली होती, ज्यामध्ये इराणचे सर्वोच्च लष्करी कमांडर कासिम सुलेमानी मारले गेले होते. अल-सादी या हल्ल्याला आपल्या गुरूची हत्या मानत होता. तेव्हापासून तो ट्रम्प कुटुंबाला संपवण्याच्या संधीत होता आणि त्याने ट्रम्प कुटुंबाला उद्ध्वस्त करण्याची शपथ घेतली होती.

याच सूडाच्या भावनेतून त्याने थेट इवांका ट्रम्प यांना लक्ष्य करण्याचे ठरवले. तपासादरम्यान सुरक्षा दलांना अल-सादीकडून इवांका ट्रम्प यांच्या फ्लोरिडा येथील आलिशान घराचे संपूर्ण नकाशे आणि विस्तृत आराखडे सापडले आहेत. तो गेल्या काही काळापासून इवांका यांच्या घराची रेकी (टेहळणी) करत होता आणि त्यांची माहिती गोळा करत होता. मात्र, कोणताही अनुचित प्रकार घडण्यापूर्वीच सुरक्षा यंत्रणांनी अत्यंत सतर्कतेने अल-सादीला बेड्या ठोकल्या.