Family Blames Police Inaction for Double Murder; Accused Demanded 10K Extortion and Wiped Out Two Brothers!

उल्हासनगर: उल्हासनगरच्या कैलास नगर परिसरात भरदिवसा झालेल्या थरारक गोळीबार प्रकरणात आता एक अत्यंत धक्कादायक आणि नवे वळण समोर आले आहे. या गोळीबारात अनिल चौहान आणि अमन चौहान या दोन सख्ख्या भावांचा मृत्यू झाल्यानंतर संपूर्ण परिसरात तणावाचे वातावरण आहे. या दुहेरी हत्येनंतर आता थेट स्थानिक पोलीस प्रशासनाच्याच भूमिकेवर गंभीर प्रश्नचिन्ह उपस्थित केले जात असून, पोलिसांच्या निष्काळजीपणामुळेच आमच्या घरातील दोन तरुण मुलांचे प्राण गेले, असा खळबळजनक आरोप मृतकांच्या कुटुंबीयांनी केला आहे.

हप्तेखोरी आणि खंडणीला विरोध ठरला कारणीभूत
मृतकांच्या पालकांनी दिलेल्या माहितीनुसार, मुख्य आरोपी शेखर बिराजदार, बलवीर बिराजदार, सागर पाटील आणि त्यांच्या साथीदारांनी महिनाभरापूर्वी परिसरात टेम्पो चालवण्यासाठी १० हजार रुपयांची बेकायदेशीर खंडणी (हप्ता) मागितली होती. केवळ खंडणी मागून हे गुंड थांबले नाहीत, तर त्यांनी खंडणी न दिल्याने या मुलांना बेदम मारहाण देखील केली होती. हप्तेखोरी व दादागिरीला विरोध केल्याचा राग मनात धरून या टोळीने चौहान कुटुंबीयांना लक्ष केले होते.

तक्रार करूनही पोलिसांनी केले दुर्लक्ष
या मारहाणीनंतर पीडित कुटुंबाने ३० एप्रिल रोजी स्थानिक हिललाईन पोलीस ठाण्यात लेखी अर्ज आणि तक्रार दाखल केली होती. त्यानंतर पोलिसांनी दखलपात्र गुन्हाही नोंदवला होता. मात्र, गुन्हा दाखल असूनही पोलिसांनी आरोपींना अटक करण्याचे पूर्णपणे टाळले आणि त्यांच्याकडे साफ दुर्लक्ष केले. "पोलिसांनी वेळीच कडक पावले उचलून आरोपींना जेलमध्ये टाकले असते, तर ते बाहेर मोकाट फिरले नसते आणि आज आमच्या दोन्ही मुलांची हत्या झाली नसती," असा उद्विग्न आणि आक्रमक सवाल कुटुंबीयांनी उपस्थित केला आहे.

१० ते १२ जणांच्या टोळीकडून १० राउंड फायर
पोलिसांनी दाखवलेल्या याच ढिसाळ कारभाराचा फायदा घेत, गुरुवारी सायंकाळी १० ते १२ जणांच्या टोळीने दुचाकीवरून येत कैलास कॉलनी चौकात अनिल आणि अमन यांच्यावर अंदाधुंद गोळीबार केला. आरोपींनी तब्बल १० राउंड फायर केले, ज्यामध्ये दोन्ही सख्ख्या भावांचा रुग्णालयात नेण्यापूर्वीच मृत्यू झाला, तर अन्य एक जण गंभीर जखमी असून त्याच्यावर खाजगी रुग्णालयात उपचार सुरू आहेत. या प्रकरणी आता वातावरण प्रचंड तापले असून, स्थानिक पोलिसांवर आमचा विश्वास राहिलेला नाही, त्यामुळे या प्रकरणाचा तपास सीआयडी (CID) किंवा सीबीआय (CBI) मार्फत करण्यात यावा, अशी आग्रही मागणी मृतकांच्या कुटुंबाने केली आहे.