पुण्यात ५ भावंडांचे धाडसी पाऊल! 'स्वतःच्या पायावर उभे राहण्यासाठी' सोडले घर; स्वारगेट बस स्थानकात काढली रात्र, पैसे संपताच पालकांना फोन

पुणे: स्वतःच्या पायावर उभे राहून, शिक्षण घेऊन मोठे होण्याच्या जिद्दीने घरातील कोणालाही न सांगता निघून गेलेल्या ५ अल्पवयीन भावंडांचा पुणे पोलिसांनी अत्यंत कौशल्याने शोध घेतला आहे. पुण्याच्या मांजरी परिसरातून बेपत्ता झालेली ही पाचही मुले स्वारगेट बस स्थानकात सुखरूप आढळून आली असून, पोलिसांनी त्यांना त्यांच्या पालकांच्या स्वाधीन केले आहे. या सुखद अंतामुळे गेल्या काही तासांपासून चिंतेत असलेल्या पालकांनी आणि पोलिसांनी सुटकेचा श्वास सोडला आहे.स्वावलंबी होण्यासाठी सोडले घरपोलिसांनी दिलेल्या माहितीनुसार, या पाच भावंडांचे आई-वडील सिंहगड रस्ता परिसरात राहतात आणि मोलमजुरी करतात. उन्हाळ्याच्या सुट्ट्या घालवण्यासाठी या कुटुंबातील तीन मुली आणि दोन मुले हडपसर जवळील मांजरी भागात राहणाऱ्या आपल्या आत्याच्या घरी आली होती. २० मे रोजी संध्याकाळी ४ वाजेच्या सुमारास या पाचही जणांनी अचानक मांजरी येथून कोणालाही न सांगता रिक्षा पकडून घर सोडले. मुले घरात दिसत नसल्याने नातेवाईकांनी सर्वत्र शोधाशोध केली, मात्र काहीच पत्ता न लागल्याने त्यांनी घाबरून मांजरी पोलीस ठाण्यात धाव घेत मुले बेपत्ता झाल्याची तक्रार नोंदवली.

स्वारगेट बस स्थानकात काढली रात्र; पैसे संपल्याने केला फोनघर सोडल्यानंतर ही पाचही मुले थेट स्वारगेट बस स्थानकात पोहोचली. त्यांच्याकडे असलेले मोजके पैसे संपल्यामुळे त्यांनी संपूर्ण रात्र बस स्थानकातच काढली. दुसऱ्या दिवशी काय करावे हे सुचेनासे झाल्याने आणि जवळचे पैसे पूर्णपणे संपल्याने, त्यांनी भीतीपोटी बस स्थानकातील एका व्यक्तीच्या मोबाईलवरून आपल्या आई-वडिलांशी संपर्क साधला आणि आपण स्वारगेटला असल्याचे सांगितले. दुसरीकडे, मांजरी पोलिसांनी आधीच तपासाची चक्रे फिरवून परिसरातील सीसीटीव्ही (CCTV) फुटेज तपासले होते. मुलांचा फोन आल्याची माहिती मिळताच पोलिसांनी युद्धपातळीवर हालचाली करत स्वारगेट बस स्थानक गाठले आणि पाचही भावंडांना ताब्यात घेतले. "आम्हाला वसतिगृहात राहून मोठे व्हायचे होते"पोलिसांनी जेव्हा मुलांकडे घर सोडण्याचे कारण विचारले, तेव्हा त्यांनी दिलेले उत्तर ऐकून पोलीसही थक्क झाले. "आई-वडिलांकडून आम्हाला कोणताही त्रास नाही. मात्र, आम्हाला स्वतःच्या पायावर उभे राहायचे होते.

एखाद्या वसतिगृहात (Hostel) राहून, स्वतः शिक्षण घेऊन मोठे व्हावे असा विचार करून आम्ही घर सोडले होते," असे मुलांनी पोलिसांना सांगितले. सुदैवाने या प्रवासादरम्यान मुलांसोबत कोणताही अनुचित प्रकार घडला नाही. पोलिसांनी मुलांचे समुपदेशन करून त्यांना पालकांच्या स्वाधीन केले आहे.