पुणे: हडपसरमध्ये आमदार रोहित पवारांचा आक्रमक पवित्रा, संतापलेल्या कार्यकर्त्यांसह दारू अड्डा केला उद्ध्वस्त!

पुणे आणि पिंपरी-चिंचवड परिसरात विषारी दारूच्या सेवनामुळे झालेल्या भीषण मृत्यूच्या सत्रामुळे संपूर्ण परिसरात खळबळ उडाली आहे. पिंपरी-चिंचवडमधील फुगेवाडी आणि पुण्यातील हडपसर-काळेपडळ भागात एकूण १८ जणांचा मृत्यू झाल्याची धक्कादायक माहिती समोर आली आहे.

या घटनेनंतर संताप व्यक्त केला जात असतानाच, राष्ट्रवादी काँग्रेस (शरदचंद्र पवार) पक्षाचे आमदार रोहित पवार यांनी आक्रमक पवित्रा घेत थेट घटनास्थळी धाव घेतली. मिळालेल्या माहितीनुसार, केमिकलयुक्त स्पिरिटचा वापर करून तयार केलेली घातक गावठी दारू फुगेवाडी आणि हडपसर परिसरात विक्रीसाठी पाठवण्यात आली होती. ही दारू पिल्याने नागरिकांना उलट्या आणि तीव्र पोटदुखीचा त्रास होऊन त्यांचा उपचारादरम्यान मृत्यू झाला. या दुर्दैवी घटनेने परिसरातील नागरिकांमध्ये दहशतीचे वातावरण निर्माण झाले आहे.

या प्रकरणावरून रोहित पवार यांनी संतप्त कार्यकर्त्यांसह हडपसरमधील संबंधित दारू विक्रीच्या अड्ड्यावर धडक दिली. त्यांनी स्वतः त्या अड्ड्याचे काऊंटर फोडले, तर कार्यकर्त्यांनी तेथील पत्रे उखडून टाकत संपूर्ण अड्डा उद्ध्वस्त केला. या घटनेप्रकरणी पोलिसांच्या भूमिकेवर प्रश्नचिन्ह उपस्थित करत, "पोलीस मुख्य सूत्रधार असलेल्या 'मोठ्या माशांना' वाचवण्याचा प्रयत्न करत आहेत," असा गंभीर आरोप रोहित पवार यांनी केला आहे. या प्रकरणात आतापर्यंत ५ जणांना ताब्यात घेण्यात आले असून, राज्य उत्पादन शुल्क विभागही तपास करत आहे.