Pune News : घरी जाताना भयंकर घडलं, इलेक्ट्रिक वायरचा शॉक लागून २ तरुणांचा जागीच मृत्यू; पुण्यात खळबळ

Pune News : पुण्यामध्ये इलेक्ट्रिक वायरचा शॉक लागून २ तरुणांचा जागीच मृत्यू झाल्याची धक्कादायक घटना घडली. पुण्यातील ब्रेमेन चौकाजवळ ही घटना घडली. औंध परिसरात असणाऱ्या एमएसईबीच्या डीपीचा झटका लागून मृत्यू झाल्याची माहिती समोर आली आहे. मृत्युमुखी पडलेल्यांपैकी एक रिक्षाचालक तर दुसरा नोकरदार आहे. विनोद चिंतामण क्षीरसागर (वय २९ वर्षे) आणि सौरभ विजय निकाळजे (वय २७ वर्षे) अशी मृत्युमुखी पडलेल्या दोघांची नावे आहेत.

मिळालेल्या माहितीनुसार, पुण्यातील औंध भागातील ब्रेमेन चौक येथील सार्वजनिक शौचालयाजवळ एमएसईबीची डीपी आहे. याठिकाणी दोन व्यक्ती बेशुद्ध अवस्थेत पडलेले आहेत अशी माहिती स्थानिक नागरिकांनी पोलिस कंट्रोल रूमला कळवली होती. घटनेची माहिती मिळताच पोलिसांनी घटनास्थळी धाव घेतली. दोघेही तरुण बेशुद्धावस्थेत पडले होते. पोलिसांनी त्यांना तात्काळ एमएसईबीच्या कर्मचाऱ्यांना बोलावून घेतलं आणि विद्युत पुरवठा बंद करण्यास सांगितला.

Pune Crime : देवाच्या आळंदीत लाजिरवाणं कृत्य, तरूणीचे अपहरण करून अब्रुचे लचके तोडले, किर्तनकार महिलेनं रचला कट

त्यानंतर पोलिस आणि एमएसईबीच्या कर्मचाऱ्यांनी दोन्ही तरुणांना बाजूला काढले. तर दोघांचाही मृत्यू झाल्याचे निदर्शनास आले. दोन्ही तरुणांनाचे मृतदेह ताब्यात घेऊन पोलिसांनी शवविच्छेदनासाठी रुग्णालयात पाठवले. दोघांच्या मृत्यूची माहिती पोलिसांनी त्यांच्या कुटुंबीयांना कळवली. या घटनेमुळे परिसरात खळबळ उडाली. यावेळी नागरिकांनी एमएसईबीवर संताप व्यक्त केला.

मृतांमधील विनोद चिंतामण क्षीरसागर हे रिक्षाचालक असून पुण्यातील औंधमधील कस्तुरबा गांधी वसाहतमधील रहिवासी होते. १३ तारखेला ते रात्री घरी न आल्याने त्यांच्या आईने पोलिसात तक्रार दिली होती. तर यातील दुसऱ्या व्यक्तीचे नाव सौरभ विजय निकाळजे असून तो नोकरदार होता. पुण्यातील कोथरूड भागात तो रहायला होता. तो रिक्षाने घराकडे निघाला होता तेव्हा ही घटना घडली. याबाबत चतुशृंगी पोलिस ठाण्यात गुन्हा दाखल करण्यात आला असून पुढील तपास सुरू करण्यात आला आहे.