पुणे-सातारा प्रवास अवघ्या एका तासात! ६,००0 कोटींचा भव्य आराखडा; खंबाटकी घाट आणि शिरवळची कोंडी फोडण्यासाठी ५ ते ६ उड्डाणपूल उभारणार

पुणे / सातारा: पश्चिम महाराष्ट्रातील वाहनधारक आणि दैनंदिन प्रवास करणाऱ्या प्रवाशांसाठी एक अत्यंत दिलासादायक आणि मोठी बातमी समोर आली आहे.
पुणे-बंगळुरू राष्ट्रीय महामार्गावरील वाढती वाहतूक कोंडी आणि वारंवार होणाऱ्या अपघातांवर कायमस्वरूपी तोडगा काढण्यासाठी राष्ट्रीय महामार्ग प्राधिकरणाने (NHAI) कंबर कसली आहे.
या महामार्गाचा कायापालट करण्यासाठी तब्बल ६,००० कोटी रुपयांचा सविस्तर प्रकल्प अहवाल (DPR) तयार केला जात असून, यामुळे भविष्यात पुणे ते सातारा हे अंतर अवघ्या १ तासात पार करणे शक्य होणार आहे.

नितीन गडकरींच्या पाहणीनंतर वेगवान हालचालीकेंद्रीय रस्ते वाहतूक आणि महामार्ग मंत्री नितीन गडकरी यांनी नुकतीच या महामार्गावरील सर्वाधिक वाहतूक कोंडी असणाऱ्या खंबाटकी घाट आणि पुण्यातील नवले पूल परिसराची प्रत्यक्ष पाहणी केली होती. या पाहणीदरम्यान त्यांनी दिलेल्या महत्त्वाच्या सूचनांनंतर प्रशासनाने हा भव्य मेगा प्लॅन तयार करण्यास सुरुवात केली आहे. सध्याच्या घडीला पुणे ते सातारा प्रवासासाठी सामान्यतः दीड ते दोन तास लागतात, तर पीक अव्हर किंवा वीकेंडला वाहतूक कोंडी असल्यास सव्वा दोन तास हमखास वाया जातात.
हाच प्रवासाचा वेळ कमालीचा कमी करणे हे या प्रकल्पाचे उद्दिष्ट आहे.पाच ते सहा उड्डाणपूल आणि वेस्टर्न बायपासची योजनाया ६,००० कोटी रुपयांच्या महत्त्वाकांक्षी प्रकल्पामध्ये अनेक मोठ्या पायाभूत सुविधांचा समावेश करण्यात आला आहे.

नवीन उड्डाणपूल: महामार्गावरील सर्वाधिक कोंडीचे बिंदू असणारे खंडाळा, शिरवळ आणि इतर महत्त्वाच्या चौकांमध्ये (जंक्शन्स) ५ ते ६ नवीन उड्डाणपूल (Flyovers) बांधले जातील. पुणे-सातारा वेस्टर्न बायपास: अवजड आणि थेट लांब पल्ल्याची वाहतूक शहरी भागातून वळवण्यासाठी १४० किलोमीटर लांबीचा
'वेस्टर्न बायपास' विकसित केला जात आहे, ज्यामुळे स्थानिक वाहतुकीवरील ताण पूर्णपणे कमी होईल. ब्लॅक स्पॉट हटवणे: महामार्गावरील अपघातप्रवण क्षेत्र म्हणजेच 'ब्लॅक स्पॉट्स' (Black Spots) शास्त्रीय पद्धतीने दुरुस्त करून कायमचे हटवले जाणार आहेत.

वाहतूक कोंडी आणि अपघातांपासून मिळणार मुक्तीNHAI च्या वरिष्ठ अधिकाऱ्यांनी दिलेल्या माहितीनुसार, स्थानिक गावांमधील रस्ते ओलांडणारी वाहने, औद्योगिक क्षेत्रातील वाहतूक आणि अवजड मालवाहू ट्रक यांच्यामुळे या महामार्गाचा वेग मंदावतो. नवीन उड्डाणपुलांमुळे स्थानिक आणि हायवेवरील वेगवान वाहतूक वेगळी होईल, ज्यामुळे वाहनांची गती ६० ते १०० किमी प्रतितास राखता येईल. या प्रकल्पामुळे केवळ वेळेचीच नव्हे, तर मोठ्या प्रमाणावर इंधनाचीही बचत होईल, ज्यामुळे लाखो प्रवाशांना मोठा दिलासा मिळणार आहे.