यवतमाळ: झोपेत असलेल्या महिलेची कुऱ्हाडीने वार करून निर्घृण हत्या; खळबळजनक घटनेने परिसर हादरला

यवतमाळ : पत्नीला वाममार्गाला लावत असल्याच्या संशयातून झोपेत असलेल्या महिलेच्या डोक्यावर कुऱ्हाडीचे घाव टाकून खून करण्यात आला. ही घटना बुधवार, दि. २९ जुलै रोजी रात्रीदरम्यान मुळावा येथील शांतीनगर परिसरात घडली. याप्रकरणी पोफाळी पोलिसांनी गुन्हा दाखल करून आरोपीला अटक केली आहे.

रुख्माबाई शंकर सरकुंडे (वय ५५, रा. मुळावा), असे मृत महिलेचे नाव आहे. गजानन खंडोजी डोंगे (४०, रा. शांतीनगर, मुळावा), असे अटक आरोपीचे नाव आहे. बुधवारी रात्री मारेकरी रुख्माबाई यांच्या घरात शिरला. संशयाच्या कारणातून गजानन डोंगे हा महिलेसोबत वाद घालत होता, असा आरोप आहे. आपल्या घरी महिला झोपेत असताना डोक्यावर कुऱ्हाडीने वार करून खून केला. घटनेची माहिती मिळताच पोफाळी पोलिस तातडीने घटनास्थळी दाखल झाले. त्यांना मृतदेह रक्ताच्या थारोळ्यात आढळून आला. पोलिसांनी पंचनामा करून मृतदेह शवविच्छेदनासाठी उमरखेड येथील उपजिल्हा रुग्णालयात पाठविला.

याप्रकरणी मृत महिलेचा मुलगा लक्ष्मण शंकर सरकुंडे (रा. खर्षी, ता. पुसद) याने पोफाळी पोलिस ठाण्यात तक्रार दिली. त्यावरून गजानन डोंगे याच्याविरुद्ध कलम १०३ (१), ३५१ (२), ३५१ (३) बीएनएस तसेच अनुसूचित जाती-जमाती अत्याचार प्रतिबंधक कायदा कलम 3(2)(4) अन्वये गुन्हा दाखल करण्यात आला आहे. आरोपीला अटक करून न्यायालयात हजर करण्यात येत आहे. घटनास्थळी एसडीपीओ अमर मोहिते, पोलिस निरीक्षक नीलेश शेंबडे व फॉरेन्सिक पथकाने भेट दिली. पुढील तपास या गुन्ह्याचा पुढील तपास प्रभारी उपविभागीय पोलिस अधिकारी अमर मोहिते करीत आहेत.

Disclaimer: या पोस्टमधील माहिती उपलब्ध वृत्तस्रोत व अधिकृत माहितीनुसार प्रकाशित करण्यात आली आहे. तपास किंवा अधिकृत प्रक्रियेनुसार तथ्यांमध्ये बदल होऊ शकतो.
या पोस्टचा उद्देश केवळ माहिती देणे असून अंतिम सत्यता संबंधित शासकीय यंत्रणा व न्यायालयीन प्रक्रियेवर अवलंबून आहे.