Pune Accident : पुण्यात एसटी बस- कारची समोरासमोर धडक, एका महिलेचा मृत्यू; ६ जण गंभीर

Pune : पुण्यामध्ये भीषण अपघाताची घटना घडली आहे. एसटी बस आणि कारमध्ये समोरासमोर धडक होऊन भीषण अपघात झाला. खडकीतील बोपोडी येथे ही घटना घडली. जुन्या मुंबई-पुणे महामार्गवर हा अपघात झाला. या अपघातामध्ये एकूण १८ जखमी झाले असून एकाचा मृत्यू झालाय. जखमींमध्ये ६ जणांची प्रकृती गंभीर आहे. जखमींना उपचारासाठी ससून रुग्णालयामध्ये दाखल करण्यात आले आहे.

मिळालेल्या माहितीनुसार, पुण्यातील जुन्या मुंबई-पुणे महामार्गावर खडकीच्या हद्दीतील बोपोडी येथे अपघात झाला. एसटी बस आणि कारची समोरासमोर धडक देऊन हा अपघात झाला. सकाळी ९ च्या सुमारास हा अपघात झाला. एसटी बसमधून १२ जण प्रवास करत होते. तर कारमधून ७ जण प्रवास करत होते. या अपघातामध्ये कारमधील एका महिलेचा मृत्यू झाला तर ६ जण गंभीर जखमी झाले. तर एसटी बसमधील १२ प्रवासी किरकोळ जखमी झाले.

Mumbai Crime : मुंबई पुन्हा हादरली, धार्मिक शिक्षण संस्थेत १३ वर्षीय विद्यार्थ्यावर लैंगिक अत्याचार

अपघाताची माहिती मिळताच पोलिसांनी घटनास्थळी धाव घेतली. जखमींना तात्काळ ससून रुग्णालयात दाखल केले. कारमधील जखमी झालेल्या ६ जणांची प्रकृती खूपच गंभीर आहे. मृत्यू झालेल्या महिलेचा मृतदेह पोस्टमॉर्टमसाठी ससून रुग्णालयात पाठवण्यात आला आहे. हा अपघात इतका भीषण होता की यामध्ये एसटी बसच्या पुढील भागाचे मोठे नुकसान झाले आहे तर कारचा अक्षरश: चक्काचूर झाला आहे.

या अपघातानंतर जुन्या मुंबई-पुणे महामार्गवर मोठी वाहतूक कोंडी झाली होती. अपघातग्रस्त दोन्ही वाहनं बाजूला हटवण्यात आले आहेत. सध्या वाहतूक पोलिसांकडून वाहतूक सुरळीत करण्याचे प्रयत्न सुरू आहेत. चालकाचे एसटी बसवरील नियंत्रण सुटल्यामुळे हा अपघात झाल्याचे सांगितले जात आहे. खडकी पोलिसांकडून या अपघाताचा तपास सुरू आहे.