भांडी व्यवसायापासून ते अंडरवर्ल्ड आणि राजकारणापर्यंत! आंदेकर टोळीची दहशत आणि ४ पिढ्यांचा रक्तरंजित इतिहास!

पुणे: पुणे हे जरी शिक्षण, संस्कृती आणि आयटी हब म्हणून ओळखले जात असले, तरी शहराच्या मध्यवर्ती भागात गेल्या काही दशकांपासून गुन्हेगारीचे सावट गडद आहे. पुण्याच्या गुन्हेगारी जगतात 'आंदेकर टोळी' हे नाव नेहमीच चर्चेत राहिले आहे. एकेकाळी तांब्या-पितळेच्या भांड्यांचा व्यवसाय करणाऱ्या या कुटुंबाचा प्रवास पुढे दहशत, गँगवॉर (टोळीयुद्ध), अंडरवर्ल्ड कनेक्शन आणि थेट स्थानिक राजकारणापर्यंत कसा पोहोचला, याचा मोठा आणि रक्तरंजित इतिहास आहे.

भांड्यांच्या व्यवसायापासून सुरुवात
आंदेकर कुटुंबाची पार्श्वभूमी सुरुवातीला गुन्हेगारीची नव्हती. पुण्याच्या मध्यवर्ती पेठांमध्ये तांब्या-पितळ्याच्या भांड्यांचा व्यवसाय करून या कुटुंबाची गुजराण होत होती. मात्र, काळाच्या ओघात वर्चस्ववादाची लढाई सुरू झाली आणि या कुटुंबातील काही सदस्यांनी गुन्हेगारीच्या जगात पाऊल ठेवले. पाहता पाहता चार पिढ्यांचा इतिहास या गुन्हेगारी, खून आणि राजकीय संघर्षाशी जोडला गेला.

अंडरवर्ल्ड कनेक्शन आणि राजकीय वर्चस्व
पुण्यातील नाना पेठ आणि आसपासच्या परिसरात आंदेकर टोळीची मोठी दहशत निर्माण झाली होती. बंडू आंदेकर, बाळू आंदेकर यांच्यापासून सुरू झालेला हा प्रवास पुढे अंडरवर्ल्डमधील काही टोळ्यांशी आणि स्थानिक राजकारणाशी जोडला गेला. या टोळीने महापालिकेत (PMC) आणि स्थानिक पातळीवर राष्ट्रवादी काँग्रेस (NCP) तसेच काँग्रेस पक्षाच्या माध्यमातून राजकीय वर्चस्व मिळवण्याचाही प्रयत्न केला. प्रमोद माळवदकर, आप्पा तरू यांसारख्या तत्कालीन गुन्हेगारांशी झालेल्या टोळीयुद्धामुळे पुण्याचा मध्यवर्ती भाग अनेकदा हादरला होता.

वनराज आंदेकरांच्या हत्येनंतर गँगवॉर भडकले
१ सप्टेंबर २०२४ रोजी माजी नगरसेवक वनराज आंदेकर यांची भरदिवसा गोळ्या झाडून आणि कोयत्याने वार करून निर्घृण हत्या करण्यात आली होती. धक्कादायक बाब म्हणजे, या हत्येमध्ये आंदेकर कुटुंबातील जवळच्या नातलगांचाच हात असल्याचे समोर आले होते. वनराज यांच्या हत्येनंतर पुण्यातील हे टोळीयुद्ध थांबलेले नाही.

२० महिन्यांत ३ हत्या; पुण्यात टोळीयुद्ध पेटले
वनराज आंदेकरांच्या हत्येनंतर गेल्या २० महिन्यांत या संघर्षातून एकापाठोपाठ एक अशा तिघांचा बळी गेला आहे. आयुष कोमकर, गणेश काळे आणि आता नुकतीच झालेली अक्षय म्हस्के याच्यावरील गोळीबाराची आणि हत्येची घटना, यावरून आंदेकर टोळीचा रक्तरंजित संघर्ष पुन्हा एकदा चव्हाट्यावर आला आहे. बालाजीनगर परिसरात झालेल्या ताज्या गोळीबारामुळे पुणेकरांमध्ये प्रचंड भीतीचे वातावरण असून, पोलिसांच्या कायदा आणि सुव्यवस्थेवर मोठे प्रश्नचिन्ह उपस्थित केले जात आहे.