संतापजनक! बलात्काराच्या आरोपीवर थेट पुष्पवृषाव, जामिनावर सुटताच काढली 'हिरो'सारखी मिरवणूक; व्हिडिओ व्हायरल!

गाझियाबाद (उत्तर प्रदेश): उत्तर प्रदेशमधील गाझियाबाद येथून महिला सुरक्षेच्या चिंधड्या उडवणारी आणि संपूर्ण समाजाला संताप आणणारी एक धक्कादायक घटना समोर आली आहे. एका बलात्काराच्या आरोपीला न्यायालयाने जामीन मंजूर केल्यानंतर, त्याच्या समर्थकांनी त्याचे एखाद्या 'हिरो'प्रमाणे स्वागत केले. आरोपीच्या गळ्यात हार घालून, त्याच्यावर पुष्पवृष्टी करत त्याची वाजत-गाजत मिरवणूक काढण्यात आली. या प्रकाराचा व्हिडिओ सोशल मीडियावर प्रचंड व्हायरल झाला असून, यावरून उत्तर प्रदेश पोलीस आणि महिलांच्या सुरक्षेबाबत गंभीर प्रश्न उपस्थित केले जात आहेत.

नेमकं प्रकरण काय आहे?
मिळालेल्या माहितीनुसार, आरोपी सुशील प्रजापती याच्यावर एका विद्यार्थिनीवर अत्याचार (बलात्कार) केल्याचा अत्यंत गंभीर आरोप आहे. या गुन्ह्याखाली तो गेल्या नऊ महिन्यांपासून तुरुंगात होता. नुकताच न्यायालयाकडून त्याला जामीन मंजूर करण्यात आला.

तो तुरुंगातून बाहेर येताच, त्याच्या समर्थकांनी कायदा आणि नैतिकतेची सर्व बंधने झुगारून दिली. आरोपीला खांद्यावर उचलून घेत, घोषणाबाजी करत त्याची भव्य मिरवणूक काढण्यात आली. या जल्लोषाचा आणि मिरवणुकीचा व्हिडिओ सोशल मीडियावर व्हायरल झाल्यानंतर नेटिझन्सनी तीव्र संताप व्यक्त केला आहे. एका गंभीर गुन्ह्यातील आरोपीचे असे जाहीर कौतुक केले जात असल्याने पीडितेच्या मनःस्थितीवर आणि सुरक्षेवर काय परिणाम होईल, असा सवाल नागरिक विचारत आहेत.

यूपी पोलीस आणि प्रशासनावर टीका
हा व्हिडिओ समोर आल्यानंतर उत्तर प्रदेशमधील कायदा व सुव्यवस्थेवर आणि पोलिसांच्या भूमिकेवर जोरदार टीका होत आहे. गुन्हेगारांमध्ये कायद्याचा धाक उरला नसल्याचेच या घटनेतून स्पष्ट होत असल्याचे लोकांचे म्हणणे आहे. या संतापजनक प्रकारानंतर आता पोलीस प्रशासनाकडून या मिरवणूक काढणाऱ्या समर्थकांवर काय कारवाई केली जाते, याकडे सर्वांचे लक्ष लागले आहे.