बुलढाणा: 'फेक' हत्याकांडात धक्कादायक ट्विस्ट: २२ दिवस जेलमध्ये राहिल्यानंतर पिता-पुत्राची सुटका; पोलिसांवर केले गंभीर आरोप!

बुलढाणा: शिवानी कळमेकर प्रकरणात पोलिसांची मोठी नामुष्कीबुलढाणा जिल्ह्यातील जळगाव जामोद येथे घडलेल्या एका कथित हत्या प्रकरणाने संपूर्ण महाराष्ट्राला हादरवून सोडले होते. ज्या तरुणीची हत्या झाल्याचा दावा करून पोलिसांनी तिच्या वडील आणि भावाला अटक केली होती, ती मुलगी प्रत्यक्षात जिवंत असल्याचे निष्पन्न झाल्याने पोलीस दलाची मोठी नाचक्की झाली आहे. आता या प्रकरणात आणखी एक मोठे वळण मिळाले असून, निर्दोष सुटका झालेल्या पिता-पुत्राने बुलढाणा पोलिसांच्या कार्यपद्धतीवर गंभीर आरोप केले आहेत.

प्रकरणाची पार्श्वभूमी: २६ एप्रिल २०२६ रोजी राजुरा धरण परिसरात एका अज्ञात महिलेचा शिर नसलेला आणि अर्धवट जळालेला मृतदेह आढळला होता. जळगाव जामोद पोलिसांनी कसलाही डीएनए (DNA) अहवाल न घेता, तो मृतदेह शिवानी कळमेकर हिचाच असल्याचा दावा केला. शिवानीच्या प्रियकरासोबतच्या अनैतिक संबंधांना कंटाळून तिच्या वडिलांनी आणि भावानेच तिची हत्या केल्याचा दावा करत, पोलिसांनी बापुराव कळमेकर आणि त्यांच्या मुलाला अटक केली होती. हे पिता-पुत्र तब्बल २२ दिवस कारागृहात होते.

अखेर काय घडले? अचानक, ज्या शिवानी कळमेकरला पोलिसांनी मृत घोषित केले होते, ती स्वतःहून मध्य प्रदेशातील बुऱ्हानपूर पोलीस ठाण्यात जिवंत हजर झाली. या प्रकारामुळे पोलिसांचा 'तपासाचा दावा' फोल ठरला. न्यायालयाने पिता-पुत्राची निर्दोष सुटका केली असून, आता त्यांनी पोलिसांच्या तपासावर आणि त्यांना विनाकारण छळल्याबद्दल गंभीर प्रश्न उपस्थित केले आहेत. या निष्काळजीपणामुळे स्थानिक गुन्हे शाखेच्या प्रभारींसह पाच कर्मचाऱ्यांची आणि जळगाव जामोदच्या ठाणेदाराची नियंत्रण कक्षात बदली करण्यात आली आहे.