CM Eknath Shinde on Badlapur Case : बदलापूरच्या नराधमाला फाशीच, मुख्यमंत्र्यांनी निक्षून सांगितलं, शिवकालीन शिक्षेचा दाखला

Ratnagiri : बदलापूर लैंगिक अत्याचार प्रकरणातील आरोपीवर अशी कलमं लावा, की फाशीची शिक्षा झाली पाहिजे, असं मुख्यमंत्री एकनाथ शिंदे म्हणाले. हा छत्रपती शिवाजी महाराजांचा महाराष्ट्र आहे. इथे मुलीबाळींच्या अब्रूशी खेळणाऱ्या पाप्यांचे हात कलम करण्याचा इतिहास आहे, असंही ते म्हणाले. रत्नागिरी येथे आयोजित करण्यात आलेल्या महिला सशक्तीकरण मोहिमे अंतर्गत ‘मुख्यमंत्री माझी लाडकी बहीण’ योजनेचा प्रचार-प्रसार मेळावा घेण्यात आला. यावेळी एकनाथ शिंदे बोलत होते.

एकनाथ शिंदे काय म्हणाले?

बदलापूरचा प्रकार दुःखद आहे, माणुसकीला काळिमा फासणारी ही घटना आहे. मी स्वतः पोलीस आयुक्तांना सांगितलं की कुठल्याही परिस्थितीत या आरोपींना फाशीची शिक्षा झाली पाहिजे. छत्रपती शिवाजी महाराजांचा हा महाराष्ट्र आहे. या महाराष्ट्रात मुलीबाळींच्या अब्रूशी खेळणाऱ्या पाप्यांचे हात कलम करण्याचा, हात छाटून टाकण्याचा इतिहास आहे. म्हणून महाराष्ट्रात अशा आरोपींची गय केली जाणार नाही, हे मुख्यमंत्री म्हणून मी कालच सांगितलं. धर्मवीर आनंद दिघे यांचा वारसा आम्ही पुढे नेतोय, त्यांच्या काळात अशा लोकांना कठोरात कठोर शिक्षा कशी मिळायची, हे आपण त्यांच्या सिनेमात पाहिलं आहे, असं एकनाथ शिंदे म्हणाले.

Pune News : निवासी डॉक्टरांचा संप कायम, ओपीडीवर सर्वाधिक परिणाम, रुग्णसेवा विस्कळीत होण्याच्या मार्गावर

महिलांना सन्मान देणारा हा महाराष्ट्र आहे. त्या नराधमाला अटक करायला मी सांगितलं, त्याला अटक केली होती, त्याच्यावर अशी कलमं लावा की त्याला फाशीची शिक्षा झाली पाहिजे, खटला फास्ट ट्रॅक कोर्टात चालवण्यास सांगितलं आहे, विशेष सरकारी वकिलांची नियुक्ती केली आहे, एसआयटी नेमली आहे. संस्था चालकांचीही चौकशी केली पाहिजे, कारण मुलींना हाताळण्यासाठी महिला-मुली पाहिजेत, त्यांनीही नियम पाळले पाहिजेत, ते पायदळी तुडवल्याने कारवाई करण्याचे आदेश दिले आहेत, असं शिंदेंनी सांगितलं.

त्या चार वर्षांच्या मुलीवरुन राजकारण केलं जात आहे. तिच्यासमोर अख्खं आयुष्य पडलं आहे. मीडियात काही जण बाईट देत आहेत, कुणी प्रेस कॉन्फरन्स घेतंय, पण कृपया त्या चिमुकलीच्या आयुष्याशी खेळू नका, तिचं आयुष्य बरबाद करु नका, हे सरकार पूर्णपणे आरोपीला फाशीच्या फंद्यापर्यंत पोहोचवल्याशिवाय राहणार नाही. हा छत्रपती शिवाजी महाराजांचा महाराष्ट्र आहे. बाळासाहेब ठाकरे, आनंद दिघे यांचा वारसा पुढे नेत आहोत. आमच्या मुलीबाळींकडे डोळे वर करुन पाहू नका, तिच्याकडे वाईट वाकड्या नजरेने पाहू नका, अत्याचार तर दूर राहिला. असं कृत्य खपवून घेतलं जाणार- नाही... नाही.. नाही... असं एकनाथ शिंदे यांनी निक्षून सांगितलं.