पुणे: मध्य रेल्वेची मालवाहतूक सुसाट; चार महिन्यांत तब्बल २७७७ कोटींचे उत्पन्न!

पुणे: मध्य रेल्वेच्या मालवाहतुकीला यंदाच्या आर्थिक वर्षात मोठी गती मिळाली असून, एप्रिल ते जुलै २०२६ या चार महिन्यांच्या कालावधीत रेल्वेने विक्रमी कामगिरी केली आहे. या काळात रेल्वेने २७.६५ दशलक्ष टन मालाची यशस्वी वाहतूक करत तब्बल २ हजार ७७७ कोटी रुपयांचा महसूल मिळवला आहे. विशेष म्हणजे, गेल्या वर्षीच्या याच कालावधीच्या तुलनेत मालवाहतुकीच्या प्रमाणात ४ टक्क्यांची वाढ नोंदवण्यात आली आहे.

महत्त्वाचे आकडे: मध्य रेल्वेने या चार महिन्यांत १०,४९८ रेकच्या माध्यमातून मालाची वाहतूक केली. गेल्या वर्षी याच काळात १०,०५५ रेकद्वारे २६.४९ दशलक्ष टन मालाची वाहतूक झाली होती. यंदा रेल्वेने ४४३ रेक अधिक चालवून मालवाहतुकीत १.१६ दशलक्ष टनांची भर घातली आहे.

 

 

विभागांनुसार कामगिरी: मध्य रेल्वेच्या विविध विभागांनी या उत्पन्नात मोलाचा वाटा उचलला आहे:

• नागपूर विभाग: हा विभाग मालवाहतुकीत आघाडीवर असून, येथून १६.३१ दशलक्ष टन मालवाहतूक होऊन १,६६७.८७ कोटी रुपयांचा महसूल प्राप्त झाला.

• मुंबई विभाग: ६.८० दशलक्ष टन मालाची वाहतूक करत ६३४.५४ कोटी रुपये उत्पन्न मिळाले.

• भुसावळ विभाग: १.६० दशलक्ष टन मालाची वाहतूक होऊन १८७.१९ कोटी रुपयांचा महसूल मिळाला.

• सोलापूर विभाग: २.३४ दशलक्ष टन मालाची वाहतूक होऊन १६३.८३ कोटी रुपये उत्पन्न मिळाले.

• पुणे विभाग: पुणे विभागानेही उत्कृष्ट कामगिरी करत ६१ लाख टन मालाची वाहतूक केली असून, त्यातून १२३.७२ कोटी रुपयांचा महसूल मिळवला आहे.

कोळशाची सर्वाधिक वाहतूक: मध्य रेल्वेच्या एकूण महसुलात कोळशाचा वाटा सर्वाधिक म्हणजेच ४९ टक्के आहे. रेल्वेने ३,४४४ रेकद्वारे १३.५४ दशलक्ष टन कोळशाची वाहतूक केली, ज्यातून १,२२७.९९ कोटी रुपयांचे उत्पन्न मिळाले. कोळशाव्यतिरिक्त कंटेनर (१३%), पेट्रोलियम पदार्थ (८%), सिमेंट (८%) आणि लोह व पोलाद (७%) यांची वाहतूक मोठ्या प्रमाणात करण्यात आली.