8-Year Love Story Ends in Drama; Bride Goes Missing on ‘Haldi’ Day After Court Marriage!”

पुरोगामी महाराष्ट्रात आजही जातीय मानसिकतेमुळे प्रेमविवाहांना कशा प्रकारे विरोध केला जातो, याचे एक धक्कादायक वास्तव डोंबिवलीत उघडकीस आले आहे. एका आंतरजातीय जोडप्याने तब्बल ८ वर्षांच्या प्रेमसंबंधांनंतर कायदेशीररित्या कोर्ट मॅरेज केले. मात्र, त्यानंतर 'समाजासमोर अधिकृत पद्धतीने पुन्हा लग्न लावून देतो' असे खोटे आश्वासन देऊन तरुणीचे कुटुंबीय तिला आपल्यासोबत घेऊन गेले. धक्कादायक बाब म्हणजे, नियोजित लग्नाच्या हळदीच्याच दिवशी ही तरुणी आणि तिचे संपूर्ण कुटुंब अचानक बेपत्ता झाले आहे. या नाट्यमय घटनेमुळे डोंबिवलीत मोठी खळबळ उडाली आहे.

८ वर्षांचे प्रेम आणि आंतरजातीय विवाहाला विरोध
मिळालेल्या माहितीनुसार, डोंबिवलीत राहणारा ओंकार बनसोडे आणि शिवानी किंगरे यांच्यात गेल्या आठ वर्षांपासून प्रेमसंबंध होते. ओंकार हा मागासवर्गीय समाजातील असल्याने शिवानीच्या कुटुंबीयांचा या विवाहाला सुरुवातीला तीव्र विरोध होता. अखेर घरच्यांचा विरोध पाहून या प्रेमी युगुलाने काही दिवसांपूर्वी कल्याण न्यायालयात (Court) जाऊन कायदेशीर नोंदणी पद्धतीचा अवलंब करत विवाह केला.

कुटुंबीयांनी रचला लग्न लावण्याचा बनाव
दोघांचे कोर्ट मॅरेज झाल्याचे समजताच शिवानीच्या कुटुंबीयांनी मवाळ भूमिका घेतली. त्यांनी "आम्ही तुमच्या लग्नाला संमती देतो, पण समाजासमोर अधिकृत आणि पारंपरिक पद्धतीने तुमचे लग्न लावून देऊ," असे ओंकार आणि त्याच्या कुटुंबाला सांगितले. त्यांच्या या बोलण्यावर विश्वास ठेवून दोन्ही बाजूंनी लग्नाची तयारी सुरू केली. लग्नासाठी डोंबिवलीतील एका हॉलची पाहणी देखील करण्यात आली, ज्याचे आगाऊ पैसे (अ‍ॅडव्हान्स) स्वतः ओंकारने भरले होते.

हळदीच्या दिवशीच नवरी आणि कुटुंब गायब
लग्नाचे विधी सुरू होण्यापूर्वी काही दिवस आधी शिवानीचे आई-वडील तिला काही विधींसाठी आपल्या घरी घेऊन गेले. सर्व काही ठरल्याप्रमाणे सुरू असताना, अचानक हळदीच्या दिवशी शिवानी बेपत्ता झाली. संशय आल्याने जेव्हा ओंकार तिच्या घरी पोहोचला, तेव्हा शिवानीच्या घराला कुलूप होते आणि तिच्या आई-वडिलांसह तिचे संपूर्ण कुटुंब तिथून गायब झाले होते. त्यांचे मोबाईल फोनही बंद येत आहेत.

आपल्या पत्नीचे तिच्याच कुटुंबीयांनी अपहरण केल्याचा किंवा तिला कुठेतरी लपवून ठेवल्याचा दाट संशय आता पती ओंकारला आहे. याप्रकरणी त्याने तात्काळ डोंबिवलीच्या मानपाडा पोलिस ठाण्यात धाव घेऊन आपली पत्नी आणि सासरच्या मंडळींविरोधात तक्रार दाखल केली आहे. मानपाडा पोलिसांनी या प्रकरणाची गंभीर दखल घेतली असून, बेपत्ता तरुणी आणि तिच्या कुटुंबाचा शोध घेण्यासाठी तपास सुरू केला आहे.