पुणे: "ओव्हरटेकच्या नादात वेगाने आलेल्या टेम्पोने उडवले; शिक्रापूरमध्ये रस्ता ओलांडणाऱ्या कामगाराचा जागीच मृत्यू."

पुणे: शिक्रापूर-चाकण रस्त्यावर हॉटेल चंद्रमासमोर रस्ता ओलांडत असताना भरधाव टेम्पोने दिलेल्या धडकेत एका हॉटेल कामगाराचा जागीच मृत्यू झाला आहे. या घटनेनंतर शिक्रापूर पोलिस ठाण्यात टेम्पोचालकावर गुन्हा दाखल करण्यात आला आहे.

अपघातात मृत्यू झालेल्या कामगाराचे नाव ताराचंद उत्तम राठोड (वय ४७, सध्या रा. शिक्रापूर, ता. शिरूर, जि. पुणे; मूळ रा. मुंगशी, ता. पुसद, जि. यवतमाळ) असे आहे. राठोड हे हॉटेल चंद्रमा येथे काम करत होते. मिळालेल्या माहितीनुसार, ताराचंद राठोड रस्ता ओलांडत असताना, शिक्रापूरहून चाकणच्या दिशेने जात असलेल्या टेम्पोने समोरील वाहनाला ओव्हरटेक करण्याच्या प्रयत्नात विरुद्ध बाजूने येऊन जोरात धडक दिली. या धडकेनंतर राठोड रस्त्यावर पडले व त्याचवेळी टेम्पोचे चाक त्यांच्या डोक्यावरून गेल्याने त्यांचा जागीच मृत्यू झाला.

घटनेच्या अवघ्या काही वेळातच पोलिस शिपाई पवन मते आणि सुशील माने यांनी घटनास्थळी धाव घेऊन टेम्पोचालकाला ताब्यात घेतले. अमर हनुमान शिंदे (वय २६, सध्या रा. शिक्रापूर, मूळ रा. ढालेगाव, ता. पाथरी, जि. परभणी) यांच्या फिर्यादीवरून टेम्पोचालक धनंजय सोपान भिवरे (रा. आळंदी देवाची, ता. खेड, जि. पुणे) याच्याविरुद्ध गुन्हा दाखल करण्यात आला आहे. पुढील तपास शिक्रापूर पोलिस करत आहेत.