"देवानं माझ्या गाडीत बसावं अशी इच्छा होती... मनोज जरांगेंना दोन कोटींची डिफेंडर देणारे मालक सुभाष भोसले स्पष्टच बोलले."

मराठा आरक्षण आणि कुणबी जात प्रमाणपत्रांच्या मुद्द्यावरून उपोषण कर्ते मनोज जरांगे पाटील यांचा सध्या पश्चिम महाराष्ट्रात झंझावती दौरा सुरू आहे. या दौऱ्यात ते जातील त्याठिकाणी त्यांचे जेसीबीद्वारे पुष्पवृष्टी करून आणि भव्यदिव्य स्वागत केले जात आहे. या संपूर्ण दौऱ्यात एका गोष्टीने सर्वांचे विशेष लक्ष वेधून घेतले आहे, ती म्हणजे मनोज जरांगे पाटील प्रवासासाठी वापरत असलेली पांढऱ्या रंगाची नवी कोरी आणि अत्यंत महागडी 'डिफेंडर' (Defender) कार. या आलिशान गाडीवरून राजकीय वर्तुळात आणि समाज माध्यमांवर विविध चर्चांना उधाण आले होते. त्यानंतर खुद्द मनोज जरांगे यांनी ही गाडी आपली नसून एका समाजबांधवाने आपल्याला वापरायला दिली असल्याचे स्पष्ट केले होते.

डिफेंडरचे मालक सुभाष भोसले काय म्हणाले? मनोज जरांगे यांना ही तब्बल दोन कोटी रुपयांच्या आसपास किंमत असलेली आलिशान डिफेंडर कार देणारे सांगोला तालुक्यातील चीक महूद येथील व्यापारी आणि प्रगतशील शेतकरी सुभाष भोसले यांनी 'एबीपी माझा'शी बोलताना आपली भावना व्यक्त केली. सुभाष भोसले म्हणाले की, "मराठा आरक्षणासाठी लढणारे मनोज जरांगे पाटील हे आमच्यासाठी देवासारखे आहेत. जसे देवाने मंदिरात किंवा आपल्या वाहनात यावे, अशी प्रत्येकाच्या मनात श्रद्धा असते, अगदी तसेच मराठा समाजासाठी अहोरात्र झटणाऱ्या या नेत्याने आपल्या गाडीत बसावे, अशी माझी तीव्र इच्छा होती."

पुढे बोलताना त्यांनी स्पष्ट केले की, जरांगे पाटील हे सामान्य जनतेच्या हक्कासाठी आणि मराठा आरक्षणासाठी जिद्दीने लढा देत आहेत, त्यामुळे त्यांच्या या संघर्षात आपलाही खारीचा वाटा असावा व त्यांना प्रवासात कोणतीही अडचण येऊ नये, या हेतूनेच आपण त्यांना ही गाडी स्वेच्छेने वापरायला दिली आहे. या मुलाखतीनंतर सोशल मीडियावर सुभाष भोसले यांच्या या भूमिकेची आणि वक्तव्याची जोरदार चर्चा रंगली आहे.