पुणे: नाणेघाटात पर्यटना गेलेल्या तरुणाचा थरारक अंत; 'अर्ध्या वाटेतून परततो' म्हणालेला तरुण दरीत कोसळला, दोन दिवसांच्या शोधानंतर मृतदेह बाहेर!

पुणे: जुन्नर तालुक्यातील ऐतिहासिक नाणेघाट परिसरात पावसाळी पर्यटनासाठी गेलेल्या एका २२ वर्षीय तरुणाचा खोल दरीत पडून मृत्यू झाल्याची दुर्दैवी घटना घडली आहे. तब्बल दोन दिवस चाललेल्या अत्यंत खडतर शोधमोहिमेनंतर मुरबाड येथील सह्यगिरी रेस्क्यू टीमने या तरुणाचा मृतदेह दरीतून यशस्वीपणे बाहेर काढला.

दत्ता विनायक लोंढे (वय २२, रा. पारगाव, ता. आंबेगाव, जि. पुणे) असे मृत तरुणाचे नाव आहे. दत्ता हा आपल्या तीन मित्रांसह नाणेघाट परिसरातील प्रसिद्ध 'नानाचा अंगठा' या पर्यटनस्थळी फिरण्यासाठी गेला होता. डोंगर चढत असताना कडाक्याची थंडी आणि वाऱ्यामुळे तो "मी अर्ध्या वाटेतून परत जातो," असे सांगून पार्किंगच्या दिशेने निघाल्याचे मित्रांनी सांगितले. मात्र, ठरलेल्या वेळी तो खाली गाडीजवळ न पोहोचल्याने मित्रांनी त्याचा शोध सुरू केला.

 

स्थानिक नागरिकांच्या मदतीने शोध घेऊनही तो न सापडल्याने जुन्नर पोलिसांना याची माहिती देण्यात आली. माहिती मिळताच जुन्नर पोलीस, वन विभाग, आपत्ती व्यवस्थापन विभाग आणि सह्याद्री गिरी रेस्क्यू टीमने घटनास्थळी धाव घेत शोधमोहीम सुरू केली. मात्र, दाट धुके, मुसळधार पाऊस आणि जोरदार वाऱ्यामुळे सोमवारी संध्याकाळी बचावकार्यात मोठ्या अडचणी निर्माण झाल्याने मोहीम थांबवावी लागली. घटनास्थळी एक चप्पल आणि माती घसरल्याच्या खुणा आढळल्याने पाय घसरून तो दरीत पडल्याचा प्राथमिक अंदाज वर्तवण्यात आला.

मंगळवारी सकाळी मुरबाडच्या दिशेने पुन्हा शोधकार्य सुरू करण्यात आले. सुमारे साडेतीन तासांच्या अथक प्रयत्नांनंतर सह्यगिरी रेस्क्यू टीमने दरीतून दत्ता लोंढे यांचा मृतदेह बाहेर काढला. या दुर्घटनेमुळे परिसरात हळहळ व्यक्त होत असून, पावसाळ्यात पर्यटकांनी अशा धोकादायक ठिकाणी जाताना योग्य ती काळजी घ्यावी, असे आवाहन प्रशासनाकडून करण्यात येत आहे.