अहिल्यानगर: मढी येथील मंदिर परिसरातील बाथरूममध्ये साधू आढळला महिलेसोबत नग्न अवस्थेत; ग्रामस्थ आक्रमक, कठोर कारवाईची मागणी

अहिल्यानगर: एक अत्यंत धक्कादायक आणि संतापजनक प्रकार समोर आला आहे. जिल्ह्यातील लाखो भाविकांचे श्रद्धास्थान असलेल्या श्री चैतन्य कानिफनाथ मंदिर देवस्थानच्या परिसरामध्ये हा प्रकार घडल्यामुळे संपूर्ण परिसरात आणि भाविकांमध्ये एकच खळबळ उडाली आहे. देवस्थानातील बाथरूममध्ये एका तथाकथित साधूने महिला सहकाऱ्यासोबत केलेले नको ते कृत्य उघडकीस आले असून, हा साधू बाथरूममध्ये एका महिलेसोबत नग्न अवस्थेत आढळून आला आहे. या घटनेमुळे धार्मिक वर्तुळात तीव्र संताप व्यक्त होत आहे.

मिळालेल्या सविस्तर माहितीनुसार, अहिल्यानगर जिल्ह्यातील पाथर्डी तालुक्यातील मढी येथे श्री चैतन्य कानिफनाथ देवाचे प्रसिद्ध मंदिर आहे. या पवित्र देवस्थानच्या परिसरात असणाऱ्या बाथरूममध्ये एक तथाकथित साधू आणि महिला संशयास्पद व नग्न अवस्थेत असल्याचे काही नागरिकांच्या निदर्शनास आले. हा प्रकार समोर आल्यानंतर स्थानिकांनी आणि भाविकांनी घटनास्थळी गर्दी केली. विशेष म्हणजे, मढी गावचे सरपंच संजय मरकड यांनी या घटनेचा व्हिडिओ थेट समाज माध्यमांवर व प्रसारमाध्यमांना उपलब्ध करून दिला आहे, ज्यामुळे हा प्रकार राज्यभर वाऱ्यासारखा पसरला.

दरम्यान, हा साधू आणि ती महिला मर्जीने एकत्र गेले होते की त्या महिलेला बळजबरीने बाथरूममध्ये नेण्यात आले होते, याबाबत अद्याप कोणतीही स्पष्ट माहिती समोर आलेली नाही. एवढी मोठी आणि संतापजनक घटना मंदिराच्या परिसरात घडूनही संबंधित पोलीस ठाण्यात याप्रकरणी अद्याप कोणताही अधिकृत गुन्हा दाखल करण्यात आलेला नाही तसेच कोणतीही कठोर कारवाई झालेली नाही. कारवाई टाळल्यामुळे ग्रामस्थांमधून आणि भाविकांमधून तीव्र संतापाची लाट उसळली आहे.

या गंभीर प्रकारावरून मढी गावचे सरपंच संजय मरकड यांनी थेट देवस्थान ट्रस्टींच्या भूमिकेवर गंभीर प्रश्नचिन्ह उपस्थित केले आहेत. मंदिराच्या पवित्र परिसरात असे प्रकार सुरू असताना देवस्थानचे ट्रस्टी मूग गिळून गप्प बसले आहेत आणि तोंडाला पट्टी लावून बसल्याचा आरोप त्यांनी केला आहे. या संपूर्ण प्रकरणाची सखोल चौकशी करण्यात यावी, दोषी ट्रस्टींवर व संबंधित साधूवर तात्काळ गुन्हे दाखल करून त्यांच्यावर कठोर कायदेशीर कारवाई करण्यात यावी, अशी आक्रमक मागणी गावकऱ्यांनी आणि ग्रामस्थांनी लावून धरली आहे. पोलीस प्रशासनाने या प्रकरणात लक्ष घालून लवकरात लवकर कायदेशीर पावले उचलली नाहीत तर तीव्र आंदोलन करण्याचा इशाराही ग्रामस्थांनी दिला आहे.