सोलापूर जिल्हा परिषदेत मोहिते-पाटील गटाचा मोठा धमाका; नव्या राजकीय समीकरणाने पालकमंत्र्यांची धाकधूक वाढली!

सोलापूर जिल्हा परिषदेच्या राजकारणात सध्या मोठी उलथापालथ पाहायला मिळत आहे. माळशिरस तालुक्यातून राष्ट्रवादी काँग्रेस (शरदचंद्र पवार) पक्षाच्या चिन्हावर निवडून आलेल्या पाच सदस्यांनी जिल्हाधिकाऱ्यांकडे स्वतंत्र गटनोंदणी केली आहे. या नव्या घडामोडीमुळे जिल्हा परिषदेत आता चार पक्ष आणि तीन आघाड्या असे नवे राजकीय गणित आकाराला आले आहे.

या नवनिर्वाचित गटाच्या गटनेतेपदी अर्जुनसिंह मोहिते-पाटील यांची निवड करण्यात आली आहे, तर उपगटनेते म्हणून गौतम माने यांच्या नावावर शिक्कामोर्तब झाले आहे. जिल्हा परिषदेत स्वीकृत सदस्यांच्या निवडीसाठी राज्य शासनाने राजपत्र प्रसिद्ध केले आहे. स्वीकृत सदस्य निवडीमध्ये गटनेत्याच्या शिफारशीला तांत्रिकदृष्ट्या अत्यंत महत्त्व असते. हीच संधी साधत, प्रशासनाने दिलेल्या मुदतवाढीत मोहिते-पाटील गटाने आपली ताकद अधिकृतपणे नोंदवली आहे.

मोहिते-पाटील यांच्या या खेळीमुळे आगामी काळात जिल्हा परिषदेतील सत्तेची समीकरणे बदलण्याची दाट शक्यता आहे. स्वीकृत सदस्यांच्या निवडीत आता कोणाची वर्णी लागणार आणि या नव्या गटामुळे सत्ताधारी भाजप किंवा इतर आघाड्यांवर काय परिणाम होणार, याकडे संपूर्ण जिल्ह्याचे लक्ष लागले आहे.