PMC Abhay Yojna : अभय योजनेचा वेग मंदावला; आतापर्यंत फक्त १५७ कोटींचीच वसुली

Pune : शहरातील विकास कामांसाठी निधी उपलब्ध व्हावा, भूसंपादनाची कामे मार्गी लागावीत यासाठी महापालिकेने मिळकतकराची थकबाकी वसूल करण्यासाठी अभय योजना सुरु केली आहे. या योजनेस एक महिना होत आला, पण त्यातून केवळ १५७ कोटी रुपये वसूल झाले आहेत. मोठे थकबाकीदार अजूनही पैसे भरण्यास टाळाटाळ करत आहेत. तसेच मिळकतकर विभागाकडूनही थकबाकी वसुलीसाठी विशेष प्रयत्न केले जात नसल्याने ही योजना फसण्याच्या मार्गावर आहे.

पुणे महापालिकेचा अर्थसंकल्प १२ हजार कोटीच्या पुढे गेला आहे. पगार आणि देखभाल दुरुस्तीवर मोठा खर्च होत असल्याने भांडवली विकास कामांना पुरेसा निधी मिळत नाही अशी स्थिती आहे. पुणे शहरातील वाहतुकीची समस्या गंभीर झाली आहे, विकास आराखड्यातील रस्ते अस्तित्वात येण्यासाठी भूसंपादन आवश्यक असले तरी त्यासाठी निधीची कमतरता आहे. तसेच सांडपाणी व्यवस्थापन, पाणी पुरवठा प्रकल्प पूर्ण करणे, नवीन उद्याने, रुग्णालय, शाळा उभारणे यासाठीही निधी लागणार आहे. पण त्यासाठी पुरेसा निधी उपलब्ध नाही.

Mumbai : मुंबईकरांसाठी नववर्षाची मोठी भेट! ओसी नसलेल्या तब्बल २०,००० इमारतींना दिलासा; १० लाखांहून अधिक नागरिकांना मोठा फायदा

मिळकतकराची थकबाकी वसूल करण्यासाठी मिळकती जप्त करणे, टाळे ठोकणे, त्यांचा लिलाव करणे अशा उपाययोजना महापालिका राबवत असते. पण त्यातून वर्षाला १००-१५० कोटी पेक्षा जास्त रक्कम जमा होत नाही. मिळकतकराची एकूण थकबाकी १३ हजार कोटी रुपये आहे, यातील न्यायालयीन प्रकरणांमध्ये सुमारे ३ हजार कोटी रुपयांची थकबाकी आहे. पण उर्वरित जागा मालक थकबाकी भरण्याकडे दुर्लक्ष करत आहेत. वाढत जाणारी थकबाकी कमी करणे, विकास कामासाठी निधी वसूल करणे यासाठी १५ नोव्हेंबर ते १५ जानेवारी या कालावधीत 'अभय योजना' राबविण्याचा निर्णय घेतला. यामध्ये थकबाकीवर ७५ टक्के सवलत दिली जात आहे.

प्रतिसाद वाढविण्यासाठी नियमात बदल

महापालिकेने यापूर्वी चार वेळा अभय योजना राबविली आहे. त्यातून ६३० कोटी रुपयांचे उत्पन्न मिळाले होते. अभय योजनेचा लाभ घेणाऱ्यांकडून पुन्हा पुन्हा थकबाकी निर्माण केली जात असल्याने चालू अभय योजनेत त्यांना लाभदेणार नसल्याचे प्रशासनाने जाहीर केले होते. मात्र, अभय योजनेला प्रतिसाद खूप कमी असल्याने त्याची व्याप्ती वाढविण्यासाठी पूर्वी लाभ घेतलेल्यांना पुन्हा अभय योजनेत सहभागी होण्याची सवलत देण्यात आली आहे.