गोरेगावात बांधकाम साईटवर थरार! कोअर कटिंग मशिनचा शॉक लागून ३४ वर्षीय कामगाराचा मृत्यू; कंत्राटदारावर गुन्हा दाखल!

मुंबई: मुंबईतील इमारतीमध्ये कोअर कटिंग मशिनवर काम करत असताना विजेचा जोरदार शॉक लागून एका ३४ वर्षीय तरुण कामगाराचा मृत्यू झाल्याची धक्कादायक घटना समोर आली आहे. ही दुर्दैवी घटना गोरेगाव पश्चिम येथील एका बांधकाम प्रकल्पावर घडली. कामाच्या ठिकाणी सुरक्षेच्या उपाययोजनांकडे पूर्णपणे दुर्लक्ष केल्याप्रकरणी गोरेगाव पोलिसांनी बांधकाम प्रकल्याचे कंत्राटदार यांच्याविरोधात गुन्हा दाखल केला आहे.

नेमकी घटना काय?
तपासातून समोर आलेल्या माहितीनुसार, मृत कामगाराचे नाव मोहम्मद हसनुजूमान दाऊद हुसैन (वय ३४, रा. खेडवाडी) असे आहे. गोरेगावमधील तीन डोंगरी परिसरात असलेल्या 'शीतल कियारा' या रिअल इस्टेट बांधकाम प्रकल्पावर लिफ्ट पिटचे कोअर कटिंगचे काम सुरू होते. यादरम्यान मोहम्मद हा कोअर कटिंग मशिनच्या सहाय्याने काँक्रीट तोडण्याचे काम करत होता. हे काम सुरू असताना अचानक त्याला विजेचा तीव्र धक्का (शॉक) बसला आणि तो जागीच कोसळला.

रुग्णालयात दाखल करण्यापूर्वीच मृत्यू:
विजेचा धक्का बसल्यानंतर तेथे उपस्थित असलेल्या इतर कर्मचाऱ्यांनी त्याला तातडीने जवळच्या एका खासगी रुग्णालयात नेले. त्यानंतर त्याला पुढील उपचारासाठी जोगेश्वरी येथील बाळासाहेब ठाकरे ट्रॉमा केअर रुग्णालयात हलविण्यात आले. मात्र, तेथील डॉक्टरांनी तपासणी अंती त्याला दाखल करण्यापूर्वीच मृत घोषित केले.

कंत्राटदाराचा निष्काळजीपणा उघड:
या अपघाती मृत्यूच्या प्रकरणाचा गोरेगाव पोलिसांनी कसून तपास केला. तपासादरम्यान असे निष्पन्न झाले की, बांधकाम प्रकल्प कंत्राटदार त्रिविक्रम लिंगराज पाढी याने कामगारांच्या जिवाची काळजी घेतली नाही. त्याने कामगारांना कामासाठी आवश्यक असणारे कोणतेही सुरक्षा साहित्य (Safety Equipment) पुरवले नव्हते, तसेच सुरक्षित विद्युत यंत्रणाही (Safe Electrical System) उपलब्ध करून दिली नव्हती. कंत्राटदाराच्या या गंभीर निष्काळजीपणामुळेच मोहम्मदचा जीव गेल्याचे स्पष्ट झाल्यानंतर, गोरेगाव पोलिसांनी कंत्राटदार त्रिविक्रम पाढी याच्याविरोधात गुन्हा दाखल केला असून पुढील कायदेशीर कारवाई सुरू केली आहे.