वसई-विरार मेट्रो मार्गिकेवर तीव्र आक्षेप! पूर्वेकडे झुकलेल्या नव्या मार्गामुळे पश्चिम पट्टा डावलल्याचा आरोप.

वसई-विरार मेट्रो मार्गिकेतून पश्चिम पट्टा गायब? नव्या आराखड्यावर सामाजिक कार्यकर्त्यांचा तीव्र आक्षेप; मुख्यमंत्र्यांकडे धाव मुंबई/वसई:वसई-विरार आणि मिरा-भाईंदर या उपनगरांना जोडणाऱ्या बहुप्रतीक्षित मुंबई मेट्रो मार्गिका १३ (Bhayandar-Virar Metro Corridor) च्या नवीन विस्तृत प्रकल्प अहवालाला (DPR) मंजुरी मिळत असतानाच, या प्रकल्पाभोवती आता वादाचे ढग जमा झाले आहेत. या मेट्रोचा मार्ग पूर्वेकडील भागातून नेण्यात आल्यामुळे, पश्चिमेकडील अत्यंत दाट लोकवस्ती असलेल्या भागांवर मोठा अन्याय झाला असल्याचा आरोप होत आहे. याविरोधात सामाजिक कार्यकर्ते ॲड. प्रवीण पाटील यांनी थेट मुख्यमंत्री आणि मुंबई महानगर प्रदेश विकास प्राधिकरणाकडे (MMRDA) लेखी तक्रार नोंदवून मार्ग बदलण्याची मागणी केली आहे.

पश्चिम पट्ट्यातील लाखो प्रवाशांकडे दुर्लक्षतक्रारीनुसार, नवीन मेट्रो मार्गिकेचे नियोजन करताना वसई-विरारच्या पश्चिम बाजूकडील स्टेला, माणिकपूर, सनसिटी, अंबाडी रोड आणि नवघर यांसारख्या अत्यंत दाट लोकवस्ती असलेल्या भागांना पूर्णपणे डावलण्यात आले आहे. या भागात राहणारे लाखो नोकरदार दररोज मुंबई आणि ठाण्याच्या दिशेने प्रवास करतात.

त्यांना खरी वाहतूक कोंडी आणि गर्दीचा सामना करावा लागतो. मात्र, मेट्रो मार्गिकेचे नियोजन पश्चिमेऐवजी पूर्वेकडील भागातून फिरवण्यात आल्याने या सामान्य प्रवाशांना कोणताही थेट फायदा मिळणार नाही. बिल्डर धार्जिणे नियोजन असल्याचा संशयप्रशासनाने केलेल्या या एकतर्फी नियोजनावर नागरिकांमधून संशय व्यक्त केला जात आहे. पूर्वेकडील ज्या भागातून सध्या मेट्रो नेण्याचे प्रस्तावित आहे, तिथे सध्या लोकवस्ती अतिशय विरळ आहे, परंतु मोठे गृहप्रकल्प उभे राहत आहेत. त्यामुळे केवळ विकासक आणि मोठ्या बिल्डरांच्या व्यावसायिक फायद्यासाठीच मेट्रोचा मूळ मार्ग बदलण्यात आला आहे का, असा सवाल सामाजिक कार्यकर्त्यांनी उपस्थित केला आहे.

सुधारित आणि संतुलित मार्गाची मागणीमिरा-भाईंदर ते विरार दरम्यानचा प्रवास सुकर करण्यासाठी एमएमआरडीएने १७ हजार ७२४ कोटी रुपयांचा नवीन आराखडा तयार केला आहे, ज्यामध्ये भाईंदर खाडीवर दुमजली पूल आणि वसई-नालासोपाऱ्यादरम्यान भूमिगत मार्ग प्रस्तावित आहे. परंतु, जर हा मार्ग पश्चिमेकडील प्रवाशांना जोडणार नसेल, तर या कोट्यवधी रुपयांच्या खर्चाचा काय फायदा, असा आक्षेप घेतला जात आहे. त्यामुळे हा वाद मिटवण्यासाठी भाईंदरवरून थेट वसई-विरारच्या पश्चिम पट्ट्याला जोडणारी सुधारित मेट्रो मार्गिका आखण्यात यावी, जेणेकरून खऱ्या गरजूंना या आधुनिक वाहतूक व्यवस्थेचा लाभ घेता येईल, अशी मागणी आता जोर धरू लागली आहे.