कोल्हापूर: आजऱ्यात बिबट्याचा थरार; मोर पकडण्यासाठी मारली तब्बल सात फूट उंच उडी, नागरिकांमध्ये भीतीचे वातावरण.

कोल्हापूर:आजरा तालुक्यातून एक अत्यंत महत्त्वाची आणि थरारक बातमी समोर आली आहे. आजरा शहरात आणि लगतच्या परिसरात बिबट्याचा वावर दिवसेंदिवस वाढत चालला असून, रविवारी सायंकाळी एका बिबट्याने मोराची शिकार करण्यासाठी चक्क ६ ते ७ फूट उंच उडी मारल्याची घटना घडली. या घटनेमुळे स्थानिक नागरिकांमध्ये आणि विद्यार्थ्यांमध्ये मोठी दहशत पसरली आहे.

नेमकी घटना कशी घडली? मिळालेल्या सविस्तर माहितीनुसार, आजरा आयटीआय (ITI) जवळ असलेल्या पारेवाडीच्या 'घोळ' नावाच्या शेतात रविवारी सायंकाळी हा प्रकार घडला. स्थानिकांच्या माहितीनुसार, रविवारी सायंकाळी मनोज देसाई आणि त्यांच्या शेतात कामाला असलेला सुनील कोरवी हे दोघे मोटारसायकलवरून शेतातून आजऱ्याकडे येत होते. त्याच वेळी त्यांच्या डोळ्यांसमोर एका बिबट्याने मोराची शिकार करण्यासाठी अचानक ६ ते ७ फूट उंच उडी मारली.

परंतु, सुदैवाने तो मोर बिबट्याच्या तावडीतून निसटला. शिकार हातून निसटल्यामुळे संतापलेला आणि डोळे वटारून केस फुलवलेल्या स्थितीत असलेला बिबट्या जवळच असलेल्या झुडपात जाऊन बसला. ही थरारक घटना स्वतः डोळ्यांनी पाहिल्यामुळे मनोज देसाई आणि त्यांचे सहकाऱ्यांना मोठा धक्का बसला आणि ते बिथरले. त्यानंतर त्यांनी प्रसंगावधान राखून मोटारसायकलचा हॉर्न वाजवत तिथून काढता पाय घेतला.

पुन्हा आवाजाची नोंद आणि नागरिकांमध्ये भीती: तेथून थोडे पुढे आल्यानंतर अवघ्या दोनच मिनिटांत पुन्हा एकदा मोरांचा मोठ्या प्रमाणावर आरडाओरड झाल्याचा आवाज ऐकू आला. यावरून बिबट्याने पुन्हा प्रयत्न करून कदाचित मोराची शिकार केली असावी, असा अंदाज वर्तवला जात आहे. या घटनेच्या साधारण १५ मिनिटांनंतर, मनोज देसाई यांचे चुलतभाऊ बबलू देसाई हेदेखील त्याच मार्गावरून  शेतातून घरी परतत असताना त्यांनाही तो बिबट्या त्याच झुडपात बसलेला स्पष्ट दिसला.

ही बातमी आजरा शहरात वाऱ्यासारखी पसरली. विशेषतः आजरा आयटीआय परिसर हा शहराच्या नजीकचे उपनगर असल्याने नागरिकांमध्ये आणि पालकांमध्ये तीव्र भीतीचे वातावरण निर्माण झाले आहे. वनविभागाने या परिसरातील बिबट्याचा बंदोबस्त करावा आणि गस्त वाढवावी, अशी मागणी नागरिकांकडून जोर धरू लागली आहे.