बंगळुरु: २ कोटींच्या विम्यासाठी सलाईनमधून विष देऊन माजी सैनिकाचा खून; प्रियकराच्या सेल्फी व्हिडिओमुळे तीन महिन्यांनी मृतदेह बाहेर काढून पर्दाफाश.

बंगळुरु: बेळगाव जिल्ह्यात एका माजी सैनिकाच्या मृत्यूचे प्रकरण संशयाच्या भोवऱ्यात सापडले आहे. ४५ वर्षीय संदीप मंजरीक यांचा तीन महिन्यांपूर्वी मृत्यू झाला होता. दोन कोटी रुपयांची विमा रक्कम मिळवण्याच्या उद्देशाने पत्नीने कट रचून पतीची हत्या केल्याच आरोप होत आहे. पोलीस या प्रकरणी अधिक तपास करत आहेत.

मयत माजी सैनिकाची बॉडी परत बाहेर काढली.कुटुंबीयांनी केलेल्या दाव्यांनंतर, पोलिसांनी शुक्रवारी संदीप मंजरीक यांची बॉडी दफनविधीनंतर तब्बल तीन महिन्यांनी पुन्हा बाहेर काढली. कर्नाटकातील बेळगाव जिल्ह्यात वर्षाच्या सुरुवातीला एका मंदिराच्या जत्रेतून परतत असताना संदीप यांचा रस्ते अपघात झाला होता. त्यांना उपचारासाठी एका खाजगी रुग्णालयात दाखल करण्यात आले होते, परंतु उपचारादरम्यान त्यांची प्राणज्योत मालवली. त्यांच्या कुटुंबीयांनी हा मृत्यू संशयास्पद असल्याचे म्हटले आहे.

पत्नी, प्रियकरावर हत्येचा आरोप
संदीप यांच्या नातेवाईकांनी त्यांची पत्नी सुमा मंजरी आणि तिचा कथित प्रियकर पुंडलिक डोंबर यांच्यावर हत्येचा कट रचल्याचा आरोप केला. त्यानंतर या तपासाला एक वेगळे वळण लागले. रुग्णालयात उपचार सुरु असताना ग्लुकोजच्या ड्रीपद्वारे संदीप यांना विष देण्यात आले असावे, या दाव्याचाही पोलीस तपास करत आहेत.

प्रियकराच्या सेल्फी व्हिडिओने गेम फिरला
प्रियकर पुंडलिकने एक 'सेल्फी व्हिडिओ' शेअर केल्यानंतर या आरोपांना अधिक बळकटी मिळाली. या व्हिडिओमध्ये त्याने दावा केला की, सुमाने तिच्या पतीच्या २ कोटी रुपयांच्या विमा पॉलिसीबद्दल त्याच्याशी चर्चा केली होती आणि विमा रक्कम मिळाल्यावर आपण बेळगावमध्ये स्थायिक होऊ शकतो, असे म्हटले होते. संदीप यांच्या मृत्यूपूर्वी सुमाने त्याला कीटकनाशक आणण्यास सांगितले होते, असा दावाही पुंडलिकने केला.

कुटुंबीयांचे आरोप लक्षात घेऊन पोलिसांनी संदीप यांचं शव पुन्हा बाहेर काढलं. त्यांचे अवशेष पुढील तपासणीसाठी न्यायवैद्यक प्रयोगशाळेत पाठवण्यात आले आहेत. तपासाचा भाग म्हणून पोलिसांनी सुमा मंजरी आणि पुंडलिक डोंबर या दोघांचीही चौकशी केली आहे. अहवाल प्राप्त झाल्यानंतर पुढील कारवाई केली जाईल, असे अधिकाऱ्यांनी सांगितले.