पुणेः ड्रग्सच्या संशयावरून छापा; ट्रॅव्हल्समधून निघाला तब्बल १२०० किलो संशयास्पद खवा!

पुणे: शहरातील काकडेवस्ती परिसरात एका ट्रॅव्हल्समधून अमली पदार्थांचा साठा येणार असल्याच्या माहितीवरून पुणे शहर पोलिसांच्या अमली पदार्थविरोधी पथकाने रविवारी (दि. ९) छापा टाकला. मात्र, कारवाईदरम्यान पोलिसांना ड्रग्सऐवजी तब्बल २० पोत्यांमध्ये सुमारे १२०० किलो संशयास्पद खवा आढळून आला. हा खवा खाण्यास योग्य आहे का, शुद्ध आहे की बनावट, याची तपासणी करण्यासाठी पोलिसांनी अन्न व औषध प्रशासनाच्या (एफडीए) अधिकाऱ्यांशी रात्री उशिरापर्यंत संपर्क साधला. मात्र, सुट्टीचे कारण देत अधिकारी घटनास्थळी न आल्याचा गंभीर प्रकार समोर आला आहे.

मिळालेल्या माहितीनुसार, खासगी ट्रॅव्हल्समधून परराज्यातून ड्रग्सचा साठा पुण्यात येणार असल्याची माहिती पोलिसांना मिळाली होती. त्यानुसार अमली पदार्थविरोधी पथकाने काकडेवस्ती परिसरात संबंधित ट्रॅव्हल्सवर छापा टाकला. यावेळी २० पोत्यांमध्ये भरलेला सुमारे १२०० किलो संशयास्पद खवा आढळून आला.

इतक्या मोठ्या प्रमाणात खवा आढळल्यानंतर तो नेमका कुठून आणण्यात आला, त्याचा वापर कशासाठी होणार होता, तसेच तो शुद्ध की भेसळयुक्त आहे, याबाबत प्रश्नचिन्ह निर्माण झाले आहे. खव्याचे नमुने तपासणीसाठी अन्न व औषध प्रशासनाची मदत आवश्यक असल्याने पुणे पोलिसांनी संबंधित अधिकाऱ्यांशी संपर्क साधला. मात्र, रात्री उशिरापर्यंत एफडीएचे अधिकारी घटनास्थळी न पोहोचल्याने पोलिसांसमोर मोठी अडचण निर्माण झाल्याचे सूत्रांनी सांगितले.

एकीकडे पोलिसांकडून संशयास्पद मालाबाबत तातडीने कारवाई करण्यात येत असताना, दुसरीकडे अन्न व औषध प्रशासनाच्या अधिकाऱ्यांकडून कारवाईबाबत टाळाटाळ होत असल्याचा प्रकार या घटनेमुळे चर्चेत आला आहे. अन्न व औषध प्रशासनाचे आयुक्त तुकाराम मुंढे यांनी पदभार स्वीकारल्यानंतर राज्यभरात निकृष्ट दर्जाच्या खाद्यपदार्थ आणि बनावट औषधांविरोधात जोरदार मोहीम सुरू केली आहे. मात्र, स्थानिक स्तरावरील अधिकाऱ्यांकडून सुट्टीचे कारण देत अशा गंभीर प्रकरणात तातडीने प्रतिसाद मिळत नसल्याने प्रश्न उपस्थित होत आहेत.

दरम्यान, या प्रकरणाबाबत अन्न व औषध प्रशासनाच्या पुणे विभागाचे सहआयुक्त दिगंबर भोगावडे यांच्याशी संपर्क साधण्याचा प्रयत्न करण्यात आला; मात्र, त्यांच्याशी संपर्क होऊ शकला नाही.