लातूरमध्ये मन हेलावून टाकणारी घटना; बोधे नगर परिसरात पाण्याच्या खड्ड्यात बुडून दोन लहान मुलांचा मृत्यू

लातूर: लातूर शहरातील बोधे नगर परिसरातून एक अत्यंत हृदयद्रावक आणि दुर्दैवी घटना समोर आली आहे. घराबाहेर खेळत असताना अचानक तोल गेल्यानं पाणी साठवण्याच्या एका मोठ्या खड्ड्यात (हौदात) पडून दोन चिमुकल्या निष्पापांचा बुडून मृत्यू झाला आहे. दिव्या नवनाथ उबाळे (वय ६ वर्ष) आणि कार्तिक भरत कांबळे (वय ७ वर्ष) अशी मृत पावलेल्या चिमुकल्यांची नावे आहेत. या घटनेमुळे संपूर्ण बोधे नगर परिसरात शोककळा पसरली असून, चिमुकल्यांच्या आई-वडिलांनी केलेला आक्रोश उपस्थितांची मने हेलावून टाकणारा होता.

खेळता खेळता गेला जीव:
मिळालेल्या माहितीनुसार, बोधे नगर येथील रामला इंडस्ट्रीजच्या पाठीमागील मोकळ्या जागेत एका खाजगी पाणी पुरवठा व्यवसायिकाने पाण्याचा मोठा खड्डा (हौद) तयार केला होता. या ठिकाणी बोरवेलचे पाणी साठवून ते टँकरच्या माध्यमातून शहरातील विविध हॉस्टेल व इतर भागात पुरवले जात असे. रविवारी दुपारी दिव्या आणि कार्तिक हे दोघे घराशेजारी खेळत असताना अचानक त्यांचा तोल गेला आणि ते या पाण्याच्या साठवण खड्ड्यात पडले.

नागरिकांची धाव, डॉक्टरांनी घोषित केले मृत:
मुलं पाण्यात पडल्याचे लक्षात येताच परिसरातील नागरिकांनी तात्काळ घटनास्थळी धाव घेतली. दोघांनाही तातडीने पाण्याच्या खड्ड्यातून बाहेर काढून उपचारासाठी शासकीय रुग्णालयात दाखल करण्यात आले. मात्र, रुग्णालयातील वैद्यकीय अधिकाऱ्यांनी तपासणीअंती या दोन्ही चिमुकल्यांना मृत घोषित केले. काळाने खेळता खेळता या दोन निष्पाप जीवांवर घाला घातल्याने परिसरात सर्वत्र हळहळ व्यक्त होत आहे.

महापालिकेच्या निष्काळजीपणावर नागरिकांचा तीव्र संताप:
या अत्यंत वेदनादायी घटनेनंतर बोधे नगर भागातील स्थानिक नागरिकांनी लातूर शहर महानगरपालिकेच्या कारभारावर आणि निष्काळजीपणावर तीव्र संताप व्यक्त केला आहे. रहिवासी भागात अशा प्रकारे खुले आणि धोकादायक पाण्याचे खड्डे असताना प्रशासनाने वेळीच योग्य पावले का उचलली नाहीत, असा सवाल नागरिक उपस्थित करत आहेत. जर तक्रारींची वेळीच दखल घेऊन अशा धोकादायक ठिकाणांना बंदिस्त केले असते, तर आज दोन निष्पाप बालकांचे प्राण वाचले असते, अशी संतप्त भावना नागरिकांनी व्यक्त केली आहे.