बँकॉकचे नोकरीचे आमिष ठरले मृत्यूचा सापळा! म्यानमारमध्ये ७०० भारतीय ओलीस, बीडचा स्वप्निल कलुंकेही तावडीत

बीड: नोकरीचे आमिष दाखवून परदेशात नेऊन तरुणांना ओलीस ठेवल्याची धक्कादायक घटना समोर आली आहे. थायलंडमध्ये ७० हजार रुपये पगाराची नोकरी देण्याचे आमिष दाखवून महाराष्ट्रातील बीड जिल्ह्याचा रहिवासी असलेला स्वप्निल कलुंके याच्यासह सुमारे ७०० भारतीयांना म्यानमारच्या सीमेवरील एका दुर्गम छावणीत ओलीस ठेवण्यात आले आहे. या आंतरराष्ट्रीय सायबर माफियांच्या तावडीतून भारतीयांची सुटका करण्यासाठी आता परराष्ट्र मंत्रालय (MEA) आणि गुप्तचर विभाग (IB) सक्रिय झाले आहेत.

 

नेमका प्रकार काय?

नोकरीच्या आमिषाने स्वप्निल याला ४ जून रोजी पुण्यातून बँकॉकमध्ये बोलावण्यात आले होते. मात्र, बँकॉकला पोहोचताच त्याला आणि इतर तरुणांना बळजबरीने म्यानमार सीमेवरील 'गोल्डन ट्रँगल' भागात नेण्यात आले. तिथे त्यांचे पासपोर्ट आणि सर्व महत्त्वाची कागदपत्रे हिरावून घेत त्यांना एका बंदिस्त छावणीत ठेवले गेले आहे.

नरकयातना आणि सायबर गुलामगिरी:

येथे अडकलेल्या तरुणांना बंदुकीच्या धाकावर दिवसातून १८-१८ तास ऑनलाईन फसवणुकीचे (सायबर फ्रॉड) काम करण्यास भाग पाडले जात आहे. जर कोणी काम करण्यास नकार दिला किंवा उद्दिष्ट (टार्गेट) पूर्ण केले नाही, तर त्यांना अमानवीय वागणूक दिली जाते. यामध्ये विजेचे शॉक देणे आणि बेदम मारहाण करण्याचा समावेश आहे. स्वप्निलने त्याच्या पत्नीला लपूनछपून फोन करून आपली बिकट परिस्थिती सांगितली. त्याने "येथे माझा जीव धोक्यात आहे आणि माझ्या डोळ्यासमोर तीन जणांना मारून टाकण्यात आले आहे," अशी धक्कादायक माहिती दिली आहे.

प्रशासनाची हालचाल:

बीड पोलिसांनी या प्रकरणाची गंभीर दखल घेतली असून, जिल्हा पोलीस अधीक्षक नवनीत काँवत यांनी या आंतरराष्ट्रीय रॅकेटच्या मुळाशी जाण्यासाठी केंद्र सरकारच्या परराष्ट्र मंत्रालयाशी पत्रव्यवहार केला आहे. राज्य सरकार आणि केंद्र सरकार दोन्ही स्तरांवर या तरुणांच्या सुटकेसाठी प्रयत्न केले जात आहेत.