पुणे: कात्रज बोगद्याजवळ काळाचा घाला! रस्त्याकडेला उभ्या असलेल्या कंटेनरला दुचाकीची जोरदार धडक; तरुणीचा जागीच मृत्यू, सोबती गंभीर जखमी

पुणे: कंटेनरवर दुचाकी आदळून दुचाकीस्वार तरुणीचा मृत्यू झाल्याची घटना मुंबई-बंगळुरू महामार्गावर नवीन कात्रज बोगद्याजवळ घडली. अपघातात दुचाकीवरील सहप्रवासी तरुणी गंभीर जखमी झाली. साक्षी अमोल सावंत (वय २२) असे मृत्युमुखी पडलेल्या दुचाकीस्वार तरुणीचे नाव आहे. अपघातात दुचाकीवरील सहप्रवासी तरुणी रेणुका बलभीम कांबळे (वय २२) जखमी झाली. तिच्यावर रुग्णालयात उपचार सुरू आहेत.

या प्रकरणी कंटेनर चालक योगेश नागनाथ सातपुते (वय ३५, रा. कौठळी, जि. सोलापूर) याच्याविरुद्ध गुन्हा दाखल करण्यात आला आहे. याबाबत पोलिस शिपाई नागेश कोळी यांनी आंबेगाव पोलिस ठाण्यात फिर्याद दिली.

 

 

पोलिसांनी दिलेल्या माहितीनुसार, दुचाकीस्वार साक्षी सावंत आणि तिची मैत्रीण रेणुका कांबळे महामार्गावरून रविवारी (दि. ११) दुपारी पावणेतीनच्या सुमारास निघाल्या होत्या. नवीन कात्रज बोगद्याजवळ थांबलेल्या १८-चाकी कंटेनरवर दुचाकीस्वार साक्षी आदळली. अपघातात दुचाकीस्वार साक्षी आणि तिची मैत्रीण रेणुका गंभीर जखमी झाल्या. अपघाताची माहिती मिळताच वरिष्ठ पोलिस निरीक्षक शरद झिने यांनी घटनास्थळी भेट दिली.

दोघींना तातडीने खासगी रुग्णालयात दाखल करण्यात आले. उपचारापूर्वीच साक्षीचा मृत्यू झाल्याची माहिती डॉक्टरांनी दिली. कंटेनर चालकाच्या चुकीमुळे अपघात झाल्याची माहिती चौकशीत मिळाली. पुढील तपास सहायक पोलिस निरीक्षक फिरोज मुलाणी करत आहेत.