नाशिक: विशेष तपासणी मोहिमेत तब्बल २० लाखांचा संशयास्पद व भेसळयुक्त माल जप्त

नाशिक: नागरिकांना सुरक्षित, स्वच्छ आणि दर्जेदार अन्नपदार्थ उपलब्ध व्हावेत यासाठी अन्न व औषध प्रशासनाकडून नाशिक शहर आणि परिसरात विशेष तपासणी मोहीम राबवण्यात येत आहे. या मोहिमेदरम्यान शहरातील मुख्य ठिकाणांसह मालेगाव परिसरातील विविध अन्न आस्थापनांवर धाडी टाकून तब्बल १९ लाख ९४ हजार ४८६ रुपये किमतीचा संशयास्पद, भेसळयुक्त व प्रतिबंधित अन्नसाठा जप्त करण्यात आला आहे.

या मोहिमेत नाशिक शहरातील कारवायांना प्राधान्य देत पथकाने विशेष पावले उचलली. चौक मंडई, जुने नाशिक येथील 'मेसर्स भारत जनरल स्टोअर'वर कारवाई करून १ लाख १ हजार ७२६ रुपये किमतीचे प्रतिबंधित अन्नपदार्थ जप्त करण्यात आले. याप्रकरणी भद्रकाली पोलिस ठाण्यात गुन्हा दाखल करून संबंधित दुकान सील करण्यात आले आहे. तसेच आडगाव येथील जत्रा हॉटेल परिसरातील 'मेसर्स स्वागतम स्वीट्स' येथून ५ हजार ७६० रुपये किमतीचे ९ किलो निकृष्ट व भेसळयुक्त संशयित गायीचे तूप जप्त करण्यात आले.

 

नाशिक शहराव्यतिरिक्त मालेगाव तालुक्यातही दोन मोठ्या जप्ती करण्यात आल्या. चंदनपुरी शिवार येथील 'मेसर्स श्रीराम एंटरप्रायझेस' येथून विनापरवाना उत्पादन, विक्री बिल नसणे आणि भेसळीच्या संशयावरून १७ लाख २७ हजार रुपये किमतीचा सैल स्वरूपातील रिफाइंड सोयाबीन तेल जप्त करण्यात आले. तर कल्ली कुट्टी येथील 'मेसर्स ए-वन ताज बेकरी' वर अत्यंत अस्वच्छ वातावरणात आणि विनापरवाना व्यवसाय चालवला जात असल्याने कारवाई करण्यात आली. तेथून १ लाख ६० हजार रुपये किमतीचा चारशे किलो टोस्ट जप्त करून बेकरीला 'व्यवसाय बंद' ची नोटीस बजावण्यात आली. नागरिकांच्या आरोग्याशी खेळ करणाऱ्या कोणत्याही व्यावसायिकाची गय केली जाणार नाही आणि भविष्यातही अशा कारवाया अधिक तीव्रतेने सुरूच राहतील, असा सज्जड इशारा अन्न व औषध प्रशासनाने दिला आहे.

जप्त मुद्देमाल तपशील:

भारत जनरल स्टोअर, जुने नाशिक: प्रतिबंधित अन्नपदार्थ - १ लाख १ हजार ७२६ रुपये

स्वागतम स्वीट्स, आडगाव, नाशिक: गायीचे तूप (९ किलो) - ५ हजार ७६० रुपये

श्रीराम एंटरप्रायझेस, मालेगाव: रिफाइंड सोयाबीन तेल - १७ लाख २७ हजार रुपये

ए-वन ताज बेकरी, मालेगाव: टोस्ट (४०० किलो) - १ लाख ६० हजार रुपये

एकूण एकत्रित जप्त माल: १९ लाख ९४ हजार ४८६ रुपये