Sunetra Pawar : राष्ट्रवादीत दिग्गज नेते असतानाही उपमुख्यमंत्रिपद सुनेत्रा पवारांनाच का? खरं कारण समोर

Mumbai : अजित पवार यांनी नेतृत्व केलेल्या राष्ट्रवादी काँग्रेस पक्षात अनुभवी मंत्री आणि दिग्गज नेते असतानाही महाराष्ट्रातील राजकारणाचा प्रत्यक्ष अनुभव नसलेल्या, प्रशासन हाताळण्याचा वकुब नसलेल्या राज्यसभा खासदार सुनेत्रा पवार यांचेच नाव उपमुख्यमंत्रिपदासाठी चर्चेत का आहे, असा प्रश्न अनेकांना पडला आहे. याचं कारण बहुसंख्य आमदारांनी पक्षाची दोरी कुटुंबातील व्यक्तीकडेच राहावी, अशी मागणी केली आहे. पार्थ पवार अननुभवी असल्याचे तूर्तास सुनेत्रा वहिनींकडेच पक्षाची आणि उपमुख्यमंत्रिपदाची धुरा जाण्याचे संकेत आहेत.

‘आमचे पंचप्राण आणि राजकीय भविष्य असलेले अजितदादा आज आपल्यात नाहीत, हे अजूनही स्वीकारणे कठीण आहे. या पोरक्या झालेल्या राष्ट्रवादी काँग्रेसला सावरण्याची ताकद सुनेत्रा पवारांकडेच आहे, त्यामुळे सुनेत्रा पवार यांनीच राष्ट्रवादीचे नेतृत्व करावे, अशी भूमिका नाशिकमधील राष्ट्रवादीच्या आमदारांनी घेतली आहे. अजित पवार यांच्या निधनानंतर पक्षाच्या नेतृत्वाबाबत सुरू असलेल्या चर्चांमध्ये सुनेत्रा पवार यांनीच पुढाकार घ्यावा, अशी भूमिका माजी मंत्री ॲड. माणिकराव कोकाटेंसह आमदारांनी मांडली आहे.

Sunetra Pawar : राष्ट्रवादीचा मोठा निर्णय! सुनेत्रा पवार उपमुख्यमंत्री; गटनेतेपदी निवडीनंतर आज सायंकाळी शपथविधी

राज्यात सर्वाधिक सात आमदार नाशिक जिल्ह्यातून निवडून आले आहेत. त्यामुळे अजित पवार यांच्या अपघाती निधनानंतर नाशिकचे आमदार काय भूमिका घेतात, याकडे लक्ष लागून होते. शुक्रवारी (दि. ३०) सायंकाळी सिन्नर नगरपालिकेच्या सभागृहात घेतलेल्या पत्रकार परिषदेत कोकाटेंसह अन्य आमदारांची भूमिका स्पष्ट केली. यावेळी नाशिकरोड-देवळालीच्या आमदार सरोज अहिरे, इगतपुरीचे आमदार हिरामण खोसकर, कळवणचे आमदार नितीन पवार आणि राष्ट्रवादी काँग्रेसचे जिल्हाध्यक्ष विष्णूपंत म्हैसधुणे उपस्थित होते.

कुटुंबातील व्यक्तीनेच पक्षाची धुरा सांभाळावी
कोकाटे म्हणाले, ‘दादांच्या नेतृत्वावर विश्वास ठेवून आम्ही कोणतीही अपेक्षा न ठेवता त्यांच्यासोबत उभे राहिलो. आज दादा नसले तरी त्यांचे विचार आणि कार्यपद्धती पुढे नेण्यासाठी त्यांच्या कुटुंबातील व्यक्तीनेच पक्षाची धुरा सांभाळावी. पंतप्रधान नरेंद्र मोदी, केंद्रीय गृहमंत्री अमित शहा आणि मुख्यमंत्र्यांशी दादांची झालेली चर्चा सुनेत्रा वहिनींना माहिती असण्याची शक्यता आहे. त्यामुळे सत्तेतील वाटा आणि पक्षाचे नेतृत्त्व त्यांच्या हाती असावे,’ असेही ते म्हणाले.

सुनेत्रा पवार यांनी उपमुख्यमंत्रीपद स्वीकारल्यास राज्यसभेवर कोणाला पाठवायचे, याचा संपूर्ण निर्णयाधिकार सुनेत्रा पवार यांच्याकडेच असावा आणि आम्ही सर्व आमदार त्यांच्या पाठीशी खंबीरपणे उभे राहू, अशी ग्वाही कोकाटे यांनी दिली. पत्रकार परिषदेदरम्यान उपस्थित आमदारांना भावना अनावर झाल्याचे चित्र पाहायला मिळाले.

४१ आमदारांचा पाठिंबा
अजित पवारांकडे असलेली महत्त्वाची मंत्रिपदे, राष्ट्रीय अध्यक्षपद तसेच गटनेतेपदाची जबाबदारी सुनेत्रा पवार यांच्याकडेच सोपवावी, असा ठराव करण्यात येणार असल्याचे कोकाटे यांनी स्पष्ट केले. सुनेत्रा वहिनींच्या नेतृत्वावर पक्षातील सर्व ४१ आमदारांचा विश्वास आहे, या संदर्भात मंत्री नरहरी झिरवाळ, दत्ता भरणे, आमदार दिलीप बनकर, किरण लहामटे, आशुतोष काळे, संग्राम जगताप यांच्यासह बहुतेक आमदारांशी चर्चा झाल्याचेही कोकाटे यांनी सांगितले.

राष्ट्रवादीचे नेते शरद पवार यांचे वय पाहता एकत्र येण्याशिवाय पर्याय नाही, अशी भूमिका मंत्री नरहरी झिरवाळ यांनी मांडली आहे. गेल्या काही दिवसांपासून अजितदादा आणि शरद पवार यांच्यात बैठकाही होत होत्या. तर, अध्यक्ष म्हणून सुनील तटकरे निर्णय घेतील, पण दोन्ही राष्ट्रवादी एकत्र आल्या तर देशपातळीवर अजित पवार यांच्या जागेवर सुप्रिया सुळे असतील किंवा प्रफुल पटेल असतील. कारण देशात ज्यांनी काम केले आहे, त्यांनाच पुढे केले जाईल, असेदेखील झिरवाळ यांनी सांगितले. तर, दोन्ही राष्ट्रवादी एकत्र येण्याचा निर्णय पवार कुटुंबच घेईल, असे कोकाटे यांनी म्हटले आहे.