पुणे: संतापजनक प्रकार चालत्या रुग्णवाहिकेतून स्ट्रेचरसह थेट रस्त्यावर कोसळला बेघर रुग्ण; सुरक्षेचा फज्जा उडाल्याने खळबळ!

पुणे: पिंपरी-चिंचवड महानगरपालिकेच्या यशवंतराव चव्हाण स्मृती रुग्णालयातून पुण्यातील ससून सर्वोपचार रुग्णालयात नेत असताना चालत्या रुग्णवाहिकेतून एक बेघर रुग्ण स्ट्रेचरसह भररस्त्यात खाली कोसळल्याची धक्कादायक आणि संतापजनक घटना समोर आली आहे. रुग्णवाहिकेचा मागचा दरवाजा उघडा राहिल्याने हा गंभीर अपघात घडला. विशेष म्हणजे रुग्ण खाली पडल्याचे भानही चालकाला नव्हते; ती अॅम्ब्युलन्स पुढे निघून गेली आणि सुमारे ९० सेकंदांनंतर (दीड मिनिटाने) घटनास्थळी परतली. सुदैवाने त्या क्षणी मागून कोणतेही भरधाव वाहन येत नसल्याने आणि स्थानिक नागरिकांनी तत्परता दाखवल्याने रुग्णाचा जीव
वाचला.

नेमकी काय आहे घटना?
एका संसर्गबाधित बेघर रुग्णावर पिंपरी येथील YCM रुग्णालयात उपचार सुरू होते. मात्र, पुरेशा वैद्यकीय सुविधा उपलब्ध नसल्याने त्याला उपचारासाठी पुण्यातील ससून जनरल रुग्णालयात हलवण्याचा निर्णय घेण्यात आला. नियमांनुसार रुग्णासोबत कोणतेही नातेवाईक नसल्यामुळे रुग्णवाहिकेत एक पोलीस कर्मचारी तैनात होता. ही रुग्णवाहिका YCM रुग्णालयाच्या मुख्य प्रवेशद्वारातून बाहेर पडताच मागचा दरवाजा अचानक उघडला आणि रुग्ण थेट स्ट्रेचरसह भररस्त्यावर आदळला.

सुरक्षा नियमांचा पुरता फज्जा
या घटनेच्या प्राथमिक तपासणीतून गंभीर त्रुटी उघडकीस आल्या आहेत. रुग्णवाहिकेच्या आत असलेल्या स्ट्रेचरची चाके सुरक्षिततेसाठी व्यवस्थित लॉकच करण्यात आलेली नव्हती. ज्या कर्मचाऱ्याने किंवा वॉर्डबॉयने रुग्णाजवळ मागे थांबणे आवश्यक होते, तो चालकाच्या शेजारील पॅसेंजर सीटवर जाऊन बसला होता. वाहनाचा मागील दरवाजा व्यवस्थित न लावल्यामुळे स्ट्रेचर घसरून दारावर आदळले आणि दरवाजा उघडून रुग्ण खाली पडला.

नागरिकांचे प्रसंगावधान; चालक व वॉर्डबॉयची एकमेकांवर ढकलाढकली
घटनेचा व्हिडिओ सोशल मीडियावर वेगाने व्हायरल झाला आहे. रुग्ण रस्त्यावर पडताच स्थानिक नागरिकांनी तत्परता दाखवत त्याला सुरक्षितपणे रस्त्याच्या कडेला हलवले. सुमारे दीड मिनिटानंतर जेव्हा अॅम्ब्युलन्स परत आली, तेव्हा चालक आणि वॉर्डबॉय एकमेकांवर चूक ढकलत वाद घालताना दिसले. तर पॅसेंजर सीटवर बसलेल्या पोलीस कर्मचाऱ्याने "मागचा दरवाजा योग्य प्रकारे बंद नव्हता" असे स्पष्ट केले.

रुग्णालय प्रशासनाकडून नोटीस जारी; सोशल मीडियावर संताप
या गंभीर प्रकाराची दखल घेत YCM रुग्णालयाचे अधिष्ठाता डॉ. राजेंद्र वाबळे यांनी सांगितले की, "या हलगर्जीपणाची गांभीर्याने दखल घेत चालक आणि संबंधित कर्मचाऱ्याला कारणे दाखवा नोटीस बजावण्यात आली आहे." दुसरीकडे, या प्रकाराचा व्हिडिओ समोर आल्यानंतर नागरिकांमधून प्रचंड संताप व्यक्त होत आहे.