पुणे: भिंतीवर कशाला, मी माझ्या कपाळावरच नरेंद्र मोदींचा फोटो चिटकवून फिरतो; भाजप-मनसे फोटो राजकारणावर संदीप देशपांडे यांचे जोरदार आव्हान

पुणे: शासकीय अभियांत्रिकी महाविद्यालयात (COEP) मनसे नेते अमित ठाकरे यांच्या दौऱ्यादरम्यान प्राचार्यांच्या कक्षात छत्रपती शिवाजी महाराज यांच्या फोटोंशेजारी पंतप्रधान नरेंद्र मोदी यांचा फोटो लावण्यात आल्याने मोठा वाद निर्माण झाला होता. या वादानंतर मनसे नेते अमित ठाकरे यांनी तो फोटो काढायला लावला होता. त्यानंतर भाजप आणि मनसे कार्यकर्ते आमनेसामने आले असून राजकीय वातावरण चांगलेच तापले आहे. या संपूर्ण प्रकरणावर आज मनसे नेते संदीप देशपांडे यांनी पत्रकार परिषद घेत भाजपवर जोरदार निशाणा साधला आणि थेट आव्हान दिले आहे.

पत्रकार परिषदेत बोलताना संदीप देशपांडे म्हणाले की, "भिंतीवर सोडा, मी माझ्या कपाळावर इथे नरेंद्र मोदी यांचा फोटो चिकटवून फिरेल." त्यांनी पुढे भाजपवर टीकास्त्र सोडत म्हटले की, लोकांची कामे होत नाहीत, उलट फक्त पक्ष फोडणे सुरू आहे. या सगळ्या राजकारणापेक्षा रस्त्यांचे कामे सुधारा, खड्डेमुक्त रस्ते तयार करा, अशी मागणी त्यांनी केली.

यावेळी बोलताना संदीप देशपांडे यांनी भाजप सरकारला २०१४ मधील आश्वासनांची आठवण करून दिली. ते म्हणाले की, भाजपने महाराष्ट्रातील सर्व शाळा चांगल्या कराव्यात, सर्व Education Sector मध्ये शिक्षक भरती करावी आणि सर्वसामान्य जनतेच्या समस्या सोडवाव्यात. २०१४ मध्ये प्रत्येक नागरिकाच्या बँक खात्यात १५ लाख रुपये जमा करण्याचे आश्वासन देण्यात आले होते, ते पैसे त्यांनी द्यावेत. तसेच तरुणांना दरवर्षी २ कोटी रोजगार देण्याचे आश्वासन देण्यात आले होते, ते पूर्ण करावेत. देश विकसनशील भारताकडून विकसित भारताकडे नेण्याच्या गोष्टी केल्या जात आहेत, त्या पूर्ण कराव्यात. भाजपने जर या सर्व गोष्टी खरोखरच केल्या, तर मी भिंतीवर सोडा, माझ्या कपाळावर नरेंद्र मोदी यांचा फोटो लावून फिरेन, असे सणसणीत आव्हान देशपांडे यांनी दिले.

नेमकी घटना काय घडली होती? मनसे नेते अमित ठाकरे हे पुण्यातील शासकीय अभियांत्रिकी महाविद्यालयातील (COEP) विद्यार्थ्यांना देण्यात येणाऱ्या सुविधांची पाहणी करण्यासाठी पुणे दौऱ्यावर आले होते. यावेळी प्राचार्यांच्या कक्षात छत्रपती शिवाजी महाराज यांच्या फोटो शेजारीच पंतप्रधान नरेंद्र मोदी यांचा फोटो लावण्यात आला होता. मनसे नेते अमित ठाकरे यांनी तो फोटो काढण्यास सांगितले, त्यानंतर कार्यकर्त्यांनी तो फोटो काढला. या कृतीनंतर भाजप आणि मनसेचे कार्यकर्ते आमनेसामने आले, ज्यावरून मोठा वाद, राडा आणि तणाव निर्माण झाला. याप्रकरणी शिवाजीनगर पोलीस ठाण्यात गुन्हे दाखल करण्यात आले असून राजकीय वर्तुळात उलट-सुलट चर्चा सुरू आहेत. या वादावर भाजप प्रदेशाध्यक्ष रवींद्र चव्हाण यांनी देखील भाजयुमोच्या आक्रमक कार्यपद्धतीवर नाराजी व्यक्त करत कडक शब्दांत कानउघडणी केली होती.