महाराष्ट्र: एसटीच्या तीर्थाटन योजनेला नवी चालना! खासगी पर्यटन संस्थांवर सुविधांची जबाबदारी; महसुलात एसटीलाही मिळणार हिस्सा

महाराष्ट्र: राज्य मार्ग परिवहन महामंडळाच्या (एसटी) 'हिंदुहृदयसम्राट बाळासाहेब ठाकरे – एसटी संगे तीर्थाटन' या महत्त्वाकांक्षी योजनेला अधिक व्यापक आणि व्यावसायिक स्वरूप देण्यासाठी खासगी पर्यटन संस्थांच्या सहभागाला तत्त्वतः मान्यता देण्यात आली आहे. या निर्णयामुळे राज्यातील भाविकांना अधिक दर्जेदार, सुसूत्र आणि सर्वसमावेशक तीर्थयात्रेची सुविधा उपलब्ध होणार असून, एसटी महामंडळालाही महसुलाचा अतिरिक्त स्रोत मिळणार आहे, अशी माहिती परिवहन मंत्री तथा एसटी महामंडळाचे अध्यक्ष प्रताप सरनाईक यांनी दिली.

नव्या धोरणानुसार, तीर्थाटन व धार्मिक सहलींचे नियोजन, निवास व्यवस्था, भोजन, स्थानिक पर्यटन, मार्गदर्शक, पिण्याचे पाणी, चहा-नाश्ता, टोल, पार्किंग तसेच पर्यटनस्थळांचे प्रवेश शुल्क यांसारख्या सर्व पूरक सुविधा खासगी पर्यटन संस्थांकडून पुरवल्या जातील. मात्र, बससेवा, प्रवासी वाहतूक आणि प्रवासभाड्याचे संपूर्ण उत्पन्न एसटी महामंडळाकडेच राहणार आहे. त्यामुळे भाविकांना 'वन-स्टॉप' पद्धतीने सर्व सुविधा उपलब्ध होतील.

या योजनेत शासनाच्या विविध सामाजिक घटकांना मिळणाऱ्या प्रवास सवलती कायम राहणार आहेत. त्यामुळे खासगी पर्यटन कंपन्यांच्या तुलनेत या योजनेतील तीर्थयात्रा अधिक किफायतशीर ठरण्याची अपेक्षा व्यक्त करण्यात आली आहे. निवास, भोजन, मार्गदर्शक, पिण्याचे पाणी, पार्किंग, टोल आणि इतर सुविधांमधून मिळणाऱ्या उत्पन्नापैकी किमान १० टक्के हिस्सा एसटी महामंडळाला देणे संबंधित पर्यटन संस्थांसाठी बंधनकारक असणार आहे.

योजनेच्या अंमलबजावणीसाठी राज्यातील सहा विभागांसाठी प्रत्येकी एका पर्यटन संस्थेची, अशा एकूण सहा पर्यटन संस्थांची निवड निविदा (RFP) प्रक्रियेद्वारे केली जाणार आहे. संबंधित संस्थांना पर्यटन क्षेत्रातील अनुभव, शासनमान्य
नोंदणी आणि आवश्यक पात्रता असणे अनिवार्य राहील. प्रारंभी ही योजना दोन वर्षे प्रायोगिक तत्त्वावर राबविण्यात येणार असून त्यानंतर मिळालेल्या प्रतिसादानुसार पुढील विस्ताराचा निर्णय घेतला जाईल.

योजनेच्या प्रसिद्धीसाठी निवडलेल्या खासगी पर्यटन संस्थांना एसटीचा अधिकृत लोगो वापरण्याची परवानगी दिली जाणार आहे. तसेच राज्यातील मराठी युवक-युवतींना पर्यटन क्षेत्रात उद्योजकता आणि रोजगाराच्या नव्या संधी उपलब्ध होतील,
असा विश्वास परिवहन मंत्री प्रताप सरनाईक यांनी व्यक्त केला आहे. त्यांच्या मते, ही योजना धार्मिक पर्यटनाला चालना देण्याबरोबरच एसटी महामंडळाच्या आर्थिक बळकटीसाठीही महत्त्वाची ठरणार आहे.