Seating row at Pune’s ‘SARTHI’ event: MP Medha Kulkarni walks out after alleged remarks by MLA Abhimanyu Pawar over front-row seating.

पुणे: मुख्यमंत्री देवेंद्र फडणवीस यांच्या उपस्थितीत 'सारथी' संस्थेमार्फत आयोजित करण्यात आलेल्या यूपीएससी (UPSC) आणि एमपीएससी (MPSC) यशस्वी विद्यार्थ्यांच्या सन्मान सोहळ्यात राजकीय नाराजीनाट्य पाहायला मिळाले. व्यासपीठावरील आसनव्यवस्थेवरून भाजप खासदार डॉ. मेधा कुलकर्णी आणि आमदार अभिमन्यू पवार यांच्यात खडाजंगी झाल्याची चर्चा आहे.

नेमकं काय घडलं?

कार्यक्रमाच्या व्यासपीठावर पहिल्या रांगेत बसण्यावरून हा वाद सुरू झाला. प्रत्यक्षदर्शींच्या माहितीनुसार, आमदार अभिमन्यू पवार यांनी मेधा कुलकर्णी यांना पहिल्या रांगेत बसण्याबाबत काही टिप्पणी केली, ज्यामुळे खासदार कुलकर्णी नाराज झाल्या. "मराठ्यांच्या कार्यक्रमात तुम्ही पहिल्या रांगेत बसणं बरं दिसत नाही," अशा स्वरूपाचे वक्तव्य पवारांनी केल्याचा आरोप करत, मेधा कुलकर्णी यांनी रागाच्या भरात भर कार्यक्रमातून काढता पाय घेतला.

अभिमन्यू पवार यांची प्रतिक्रिया:

या वादावर स्पष्टीकरण देताना आमदार अभिमन्यू पवार म्हणाले की, "ताईंचा गैरसमज झाला आहे. मी फक्त एवढेच म्हटले होते की, अण्णासाहेब पाटील विकास महामंडळाचे अध्यक्ष नरेंद्र पाटील यांना पुढे बसू द्या, कारण ते संबंधित महामंडळाचे अध्यक्ष आहेत. आपण दोघं मागे बसू, एवढंच माझं म्हणणं होतं. यात कोणताही जातीचा विषय किंवा वाद काढण्याचा हेतू नव्हता."

तसेच, माझ्या वक्तव्यामुळे जर कुणाच्या भावना दुखावल्या असतील, तर मी दिलगिरी व्यक्त करतो, असेही पवार यांनी नमूद केले. मेधा कुलकर्णी या आपल्या ज्येष्ठ नेत्या असून, त्यांच्याबद्दल आदर असल्याचेही त्यांनी स्पष्ट केले. या घटनेमुळे कार्यक्रमस्थळी आणि राजकीय वर्तुळात मोठी चर्चा रंगली असून, यावरून आता विविध राजकीय प्रतिक्रिया उमटू लागल्या आहेत.