पुणे: मेसमधील निकृष्ट जेवण अन् पंतप्रधान मोदींच्या फोटोवरून पुण्याचे शासकीय तंत्रनिकेतन कॉलेज आले चर्चेत

पुणे: शिवाजीनगर येथील शासकीय तंत्रनिकेतन महाविद्यालयातील कँटीनमधील निकृष्ट जेवण आणि क्रीडा प्रशिक्षकच नसणे यावरून विद्यार्थ्यांमध्ये नाराजी आहे. या पार्श्वभूमीवर महाराष्ट्र नवनिर्माण विद्यार्थी सेनेचे अध्यक्ष अमित ठाकरे यांनी सोमवारी (दि. ३१) महाविद्यालयाला भेट देऊन या प्रश्नांवर प्राचार्यांना जाब विचारला. तसेच कार्यालयात छत्रपती शिवाजी महाराज आणि डॉ. बाबासाहेब आंबेडकर यांच्या शेजारी पंतप्रधान नरेंद्र मोदी यांचा फोटो लावल्याचे पाहून तीव्र संताप व्यक्त केला. सीओईपी पाठोपाठ शासकीय तंत्रनिकेतनही आता राजकीय चर्चेच्या केंद्रस्थानी आले आहे.

'महाराजांच्या आणि बाबासाहेबांच्या बाजूला मोदींचा फोटो कशाला?' असा सवाल अमित ठाकरे यांनी प्राचार्यांना केला. तसेच तात्काळ फोटो हटवण्यास सांगितले. त्यावर प्रशासनाने फोटो हटवण्यास नकार देताच, मनसे कार्यकर्त्यांनी आक्रमक पवित्रा घेत स्वतःच फोटो खाली उतरवला. या घटनेचा व्हिडिओ व्हायरल होत आहे. याबाबत प्राचार्य डॉ. राजेंद्र पाटील यांनी चतुःशृंगी पोलिस ठाण्यात तक्रार दिली आहे.

'नरेंद्र मोदींची तुलना छत्रपती शिवराय आणि डॉ. बाबासाहेब आंबेडकर यांच्याशी होऊच शकत नाही' असे स्पष्ट करत अमित ठाकरे यांनी मनविसे कार्यकर्त्यांनी फोटो हटवल्याच्या कृतीचे समर्थन केले. शासकीय प्रोटोकॉलनुसार पंतप्रधानांचा फोटो लावण्यास आक्षेप नाही, मात्र तो महापुरुषांच्या शेजारी न लावता दुसरीकडे लावावा. 'उद्या तुम्ही देवघरात मोदींचा फोटो लावाल का?' असा प्रतिप्रश्न केला. भाजपचे नेते याचा निषेध करत असतील तर त्यांना विचारा की, तुम्हाला छत्रपती शिवराय आणि मोदींची तुलना मान्य आहे का? आम्ही महाराजांचा अपमान सहन करणार नाही, असा इशारा दिला. उच्च व तंत्रशिक्षण मंत्र्यांनीही महाविद्यालय प्रशासनाची भेट घेऊन चर्चा केली.

पुण्यातील विविध महाविद्यालयांत मनविसेचे कॅम्पेन
महाराष्ट्र नवनिर्माण विद्यार्थी सेना सदस्य नोंदणी अभियानांतर्गत अमित ठाकरे यांनी सोमवारी पुण्यातील विविध महाविद्यालयांना भेट दिली. गणेशखिंड रोड येथील गव्हर्नमेंट पॉलिटेक्निक कॉलेजपासून सुरू करून एक-एक करत काही महाविद्यालयांना भेटी दिल्या. सर परशुरामभाऊ महाविद्यालय, भारती विद्यापीठ कॅम्पस, वाडिया महाविद्यालय, विश्वकर्मा युनिव्हर्सिटी येथे मनविसे शाखेचे उद्घाटन केले. पुणे विद्यार्थी गृह 'कॉलेज ऑफ इंजिनिअरिंग'लाही भेट दिली. या दरम्यान विद्यार्थ्यांशी संवाद साधला, अशी माहिती मनविसेचे शहराध्यक्ष धनंजय दळवी यांनी दिली.