एसटी बस प्रवाशांसाठी महत्त्वाची सूचना! १ ऑगस्टपासून 'हे' कार्ड बंधनकारक; सवलत हवी असल्यास आताच करा नोंदणी.

मुंबई: महाराष्ट्र राज्य मार्ग परिवहन महामंडळाच्या (MSRTC) बसने प्रवास करणाऱ्या महिला, ज्येष्ठ नागरिक आणि 'अमृत ज्येष्ठ नागरिक' योजनेच्या लाभार्थ्यांसाठी अत्यंत महत्त्वाची बातमी आहे. एसटी प्रवासात अधिक पारदर्शकता आणि डिजिटल व्यवहारांना चालना देण्यासाठी, येत्या १ ऑगस्ट २०२६ पासून 'नॅशनल कॉमन मोबिलिटी कार्ड' (NCMC) स्मार्ट कार्ड बंधनकारक करण्यात येणार आहे. राज्याचे परिवहन मंत्री तथा एसटी महामंडळाचे अध्यक्ष प्रताप सरनाईक यांनी ही माहिती दिली आहे.

काय आहे निर्णय?
सवलतीच्या दरात एसटी प्रवास करणाऱ्या प्रवाशांना आता स्मार्ट कार्ड असणे अनिवार्य असेल. या निर्णयाची अंमलबजावणी १ ऑगस्टपासून होणार असून, त्यानंतर स्मार्ट कार्डशिवाय सवलतीचा प्रवास करणे कठीण होऊ शकते. त्यामुळे संबंधित लाभार्थ्यांनी तातडीने नोंदणी पूर्ण करण्याचे आवाहन प्रशासनाकडून करण्यात आले आहे.

आतापर्यंतची स्थिती:
मिळालेल्या माहितीनुसार, आजअखेर राज्यात सुमारे ५१ लाख नागरिकांनी NCMC स्मार्ट कार्डसाठी आपली नोंदणी पूर्ण केली आहे. यापैकी सुमारे २५ लाख स्मार्ट कार्ड सध्या कार्यान्वित झाले आहेत. नोंदणी केलेल्या उर्वरित लाभार्थ्यांची कार्डेही लवकरच सक्रिय केली जाणार आहेत.

४ हजारांहून अधिक केंद्रांवर सोय:
प्रवाशांची गैरसोय टाळण्यासाठी आणि कार्ड वितरण प्रक्रिया सुलभ करण्यासाठी संपूर्ण राज्यात ४ हजारांहून अधिक NCMC स्मार्ट कार्ड वितरण केंद्रे कार्यरत करण्यात आली आहेत. ग्रामीण आणि शहरी भागातील नागरिकांना ही सुविधा सहज उपलब्ध व्हावी यासाठी ही यंत्रणा राबवली जात आहे.

गैरव्यवहारावर इशारा:
या प्रक्रियेत कोणताही गैरव्यवहार खपवून घेतला जाणार नाही, असा इशारा मंत्री प्रताप सरनाईक यांनी दिला आहे. विहित शुल्कापेक्षा अधिक रक्कम आकारणाऱ्या केंद्रांवर कडक कारवाई करण्यात येणार असून, दोषी आढळल्यास त्यांचा परवाना तत्काळ रद्द केला जाईल, असेही त्यांनी स्पष्ट केले आहे.

 

सविस्तर वाचा, लिंक कमेंट मध्ये  https://punenews24.in/