Maharashtra Politics : ठाकरे गटानंतर बविआला मोठा धक्का, बड्या नेत्याचा भाजपमध्ये प्रवेश

Maharashtra : आगामी वसई विरार महानगरपालिका निवडणुकीसाठी भाजपची मोर्चेबांधणी सुरु झाली आहे. निवडणुकीच्या पार्श्वभूमीवर वसई-विरारमध्ये राजकीय उलथापालथ सुरु झाली आहे. काही दिवसांपूर्वी बहुजन विकास आघाडीचे नेते नितीन ठाकूर यांनी दोन माजी नगरसेविकांसह भारतीय जनता पक्षात प्रवेश केला होता. आता आणखी एका नेत्याने बहुजन विकास आघाडीतून भाजपमध्ये पक्षांतर केले आहे. वसई-विरारमध्ये ठाकरे गटानंतर भाजपने बविआला धक्के दिले आहेत.

वसई विरारमध्ये भारतीय जनता पक्षाने बहुजन विकास आघाडीला धक्का दिला आहे. वसई विरारचे माजी नगरसेवक महेश पाटील यांनी भाजपमध्ये प्रवेश केला आहे. आज त्यांच्या पक्षप्रवेशाचा कार्यक्रम पार पडला. बविआच्या शेकडो कार्यकर्त्यांसह महेश पाटील यांनी भाजपची वाट धरली. याआधी बविआमधील आमदारांनी भाजपमध्ये प्रवेश केला होता.

Maharashtra Politics : नवी मुंबईत भाजपला मोठं खिंडार, पदाधिकारी आणि कार्यकर्त्यांचा ठाकरेंच्या शिवसेनेत प्रवेश

भाजपचे प्रदेशाध्यक्ष रविंद्र चव्हाण यांच्या उपस्थितीमध्ये महेश पाटील यांचा पक्षप्रवेश पार पडला. 'वसई विरारचे प्रश्न सोडवायचे असतील, तर ट्रिपल इंजिनच सरकार आणण्याची गरज आहे. महापालिकेत सत्ता आल्यास आम्ही पारदर्शक कारभार करु', असे वक्तव्य रविंद्र चव्हाण यांनी केले आहे. महेश पाटील यांच्या पक्षप्रवेशामुळे बहुजन विकास आघाडीला मोठा धक्का बसल्याचे मानले जात आहे.

५ ऑगस्ट रोजी शिवसेना ठाकरे गटाचे माजी जिल्हाप्रमुख पंकज देशमुख यांनी तब्बल १६ विभाग प्रमुखांसह भाजपमध्ये प्रवेश केला होता. देशमुख हे आधी बहुजन विकास आघाडीमध्ये होते. कालांतराने त्यांनी शिवसेनेची वाट धरली होती. शिवसेनेच्या पाठोपाठ भाजपमध्ये बहुजन विकास आघाडीतील नेत्यांची एन्ट्री होत असल्याचे पाहायला मिळत आहे.