Nashik : प्रसाद’ की सापळा? महिलांना बेभान करणाऱ्या औषधाचा पर्दाफाश; खरातने काय सांगितलं?

Nashik : स्वयंघोषित ज्योतिषी आणि भोंदूबाबा अशोक खरात प्रकरणात आता एक मोठी अपडेट समोर आली आहे. महिलांना जाळ्यात ओढण्यासाठी खरातने वापरलेल्या कथित ‘गूढ औषधा’बाबत तपास यंत्रणांनी गंभीर चौकशी सुरू केली आहे. या औषधामध्ये नेमके कोणते रसायन मिसळले होते, याचा उलगडा अद्याप झालेला नाही.  

अशोक खरात प्रकरणामुळे राज्यभरात मोठी खळबळ उडाली आहे. त्याच्यावर अनेक महिलांवर आणि अल्पवयीन मुलींवर लैंगिक अत्याचार केल्याचे गंभीर आरोप आहेत. यासंदर्भात जवळपास 56 व्हिडीओ समोर आले असून, त्याच्याविरोधात 11 तक्रारी नोंद झाल्याची माहिती मिळाली आहे. या संपूर्ण प्रकरणाचा तपास सध्या विशेष तपास पथक (SIT) करत आहे.

 

प्रसादा’मागचं गूढ काय?

तपासात समोर आलेल्या माहितीनुसार, खरात आपल्या केबिनमध्ये येणाऱ्या महिलांना खारट किंवा कडवट चवीचे द्रव औषध देत असे. त्यासोबत तो विशेष पेढेही खायला लावत होता. हे पदार्थ सेवन केल्यानंतर महिलांना काही वेळातच मळमळ, डोके गरगरणे, जडपणा आणि गुंगी येत असल्याचे समोर आले आहे.

या अर्धबेशुद्ध अवस्थेचा फायदा घेत, केबिनमधील दिवे बंद करून खरात महिलांवर लैंगिक अत्याचार करत असल्याचा SIT चा प्राथमिक निष्कर्ष आहे. या ‘प्रसादा’मुळे पीडित महिलांना त्याच्या सांगण्याप्रमाणे वागण्यास भाग पाडले जात होते, असा संशय व्यक्त करण्यात येत आहे.

औषधात नेमकं काय?

या प्रकरणातील सर्वात मोठा प्रश्न म्हणजे त्या द्रव पदार्थात आणि पेढ्यांमध्ये नेमके काय मिसळले होते? हे कोणत्या प्रकारचे गुंगी आणणारे रसायन होते? याबाबत अद्याप कोणतीही ठोस माहिती समोर आलेली नाही.

सरकारी वकील शैलेंद्र बागडे यांनी न्यायालयात सांगितले की, अशोक खरात तपासात सहकार्य करत नाही. या ‘गूढ औषधा’बाबत तो माहिती देण्यास टाळाटाळ करत आहे. त्यामुळेच SIT ने त्याच्या पोलीस कोठडीत वाढ करण्याची मागणी केली.

 पुढील कारवाई

काल न्यायालयात हजर करण्यात आल्यानंतर, अशोक खरातला 4 दिवसांची पोलीस कोठडी सुनावण्यात आली आहे. त्यामुळे त्याला 1 तारखेपर्यंत पोलीस कोठडीत ठेवण्यात येणार आहे.

दरम्यान, या ‘विषारी’ पेढ्यांचा आणि संशयित द्रव पदार्थाचा स्त्रोत शोधण्यासाठी SIT कडून तपास वेगाने सुरू आहे. येत्या काही दिवसांत या गूढ औषधामागील सत्य समोर येते का, याकडे संपूर्ण महाराष्ट्राचे लक्ष लागले आहे.