नाशिक: महागाईचं विघ्न! आंतरराष्ट्रीय युद्ध अन् एफडीएच्या कारवाईमुळे गणेशमूर्तींच्या दरात ३० टक्क्यांनी वाढ

नाशिक: गणेशोत्सवाच्या पार्श्वभूमीवर नाशिकमधील बाजारपेठा बाप्पाच्या स्वागतासाठी पूर्णपणे सज्ज झाल्या आहेत. मात्र, यंदा बाप्पाच्या आगमनावर महागाईचे मोठे विघ्न ओढवले असून, आंतरराष्ट्रीय पातळीवरील युद्धाची झळ आणि अन्न व औषध प्रशासनाच्या (FDA) कारवाईमुळे गणेशमूर्तींच्या किमती तब्बल २५ ते ३० टक्क्यांनी वाढल्या आहेत. कच्चा माल, रंग, आवश्यक थिनर आणि वाहतूक खर्चात मोठी वाढ झाल्याने यंदा गणेशोत्सवाचा एकूण खर्च सर्वसामान्यांच्या खिशाला ताण देणारा ठरत आहे.

विविध आकर्षक मूर्तींना मोठी मागणी: यंदाच्या गणेशोत्सवात पेणच्या प्रसिद्ध गणेशमूर्तींसह 'लालबागचा राजा', 'चिंतामणी', 'दगडूशेठ', 'फेटाधारी गणेश' आणि 'जय मल्हार' यांसारख्या विविध रूपातील मूर्तींना बालगोपाळांसह भाविकांची पसंती मिळत आहे. विशेषतः 'चिंतामणी' रूपातील मूर्तींची क्रेझ बाजारपेठेत मोठ्या प्रमाणावर दिसून येत आहे, अशी माहिती मूर्तिकारांनी दिली आहे.

युद्धाची आणि महागाईची मोठी झळ: आंतरराष्ट्रीय पातळीवर सुरू असलेल्या युद्धाचा थेट परिणाम कच्च्या मालाच्या आयातीवर आणि पुरवठ्यावर झाला आहे. मूर्ती रंगवण्यासाठी लागणारे रंग, थिनर आणि सजावटीच्या वस्तूंचे दर तब्बल १५ ते २० टक्क्यांनी वाढले आहेत. तसेच, मूर्ती पॅकिंगसाठी वापरल्या जाणाऱ्या प्लास्टिकच्या पिशव्या, शाहू माती आणि वाहतूक खर्चामध्ये प्रचंड वाढ झाल्यामुळे मूर्तिकारांना नाइलाजास्तव मूर्तींच्या किमती वाढवाव्या लागल्या आहेत.

याशिवाय, सजावटीच्या साहित्याच्या बाजारभावातही मोठी वाढ झाली आहे. कागद, कच्चा माल आणि मजुरी वाढल्याने मखरांचे भाव १५ ते २० टक्क्यांनी वधारले आहेत.

सजावट साहित्याचे दर:

• कागदी व फोल्डिंग मखर: ५०० ते ३,००० रुपये

• लाकडी व डिझायनर मंदिरे: ३,२०० ते ७,५०० रुपये

• कापडी बॅकड्रॉप: ३०० ते ८०० रुपये

• कृत्रिम तोरणे व फुलांच्या माळा: ४० ते १५० रुपये

या सर्व कारणांमुळे यंदाचा गणेशोत्सव साजरी करताना नागरिकांना आर्थिक फटका बसत असून, भाविकांना वाढीव खर्चाचा सामना करावा लागत आहे.