साताऱ्यात आंतरराष्ट्रीय सायबर रॅकेट उद्ध्वस्त! अमेरिकन नागरिकांना 'डिजिटल अरेस्ट'ची भीती दाखवून डॉलर लुटणारे बोगस कॉल सेंटर पोलिसांकडून उद्ध्वस्त

साताऱ्यात गेल्या काही काळापासून देशभरात धुमाकूळ घालणाऱ्या 'डिजिटल अरेस्ट' (Digital Arrest) या सायबर गुन्ह्याचे धागेदोरे आता चक्क साताऱ्यापर्यंत पोहोचले आहेत. सातारा स्थानिक गुन्हे शाखा (LCB) आणि कोरेगाव पोलिसांनी संयुक्तपणे एक मोठी कारवाई करत कोरेगावमधील एका आंतरराष्ट्रीयसायबर गुन्हेगारी टोळीचा पर्दाफाश केला आहे. एका बोगस कॉल सेंटरवर छापा टाकून पोलिसांनी १७ संशयितांना ताब्यात घेतले असून ५ मुख्य सूत्रधारांना अटक केली आहे.

हे आरोपी साताऱ्यात बसून थेट अमेरिकेतील नागरिकांना 'डिजिटल अरेस्ट'ची भीती दाखवून लाखो डॉलर्स उकळत होते. छोट्या शहराची निवड आणि संशयास्पद हालचालीपोलिसांनी दिलेल्या माहितीनुसार, कोरेगाव-रहिमतपूर मार्गावरील सुभाषनगर येथील एका अपार्टमेंटमध्ये 'श्रीसाई लॉजिस्टीक्स अँड कन्सल्टन्स एलएलपी' या नावाने हे बेकायदा कॉल सेंटर फेब्रुवारी २०२६ पासून चालवले जात होते. एका छोट्या शहरात किंवा गावात असे कॉल सेंटर चालवले तर कोणालाही संशय येणार नाही, या उद्देशाने आरोपींनी कोरेगावची निवड केली होती. हे कॉल सेंटर पूर्णपणे अमेरिकन वेळेनुसार म्हणजेच रात्री १० ते सकाळी ८ वाजेपर्यंत चालत असे.अशी होती फसवणुकीची पद्धत (Modus Operandi)या कॉल सेंटरमधील तरुण-तरुणींना अमेरिकन लहेजाचे (American Accent) प्रशिक्षण देण्यात आले होते. ते व्हर्च्युअल प्रायव्हेट नेटवर्क (VPN) चा वापर करून अमेरिकन नागरिकांशी संपर्क साधायचे.

आरोपी आधी त्यांना "तुमच्या नावाने ई-कॉमर्स साईटवरून संशयास्पद खरेदी झाली आहे" किंवा "तुमचा अंमली पदार्थ (Drugs) तस्करीशी संबंध आहे" अशी भीती दाखवायचे. त्यानंतर अमेरिकेचे कायदा अंमलबजावणी अधिकारी बोलत असल्याचे भासवून त्यांना 'डिजिटल अरेस्ट'ची धमकी दिली जायची.कारवाई टाळण्यासाठी किंवा केस बंद करण्यासाठी त्यांच्याकडून ऑनलाइन गिफ्ट कार्ड, व्हाऊचर किंवा क्रिप्टो करन्सीच्या माध्यमातून डॉलर स्वरूपात पैसे उकळले जात होते. पोलिसांची धाड आणि पुरावे नष्ट करण्याचा प्रयत्नस्थानिक गुन्हे शाखेच्या पथकाला खबऱ्याकडून मिळालेल्या माहितीच्या आधारे पोलिसांनी या अपार्टमेंटवर अचानक छापा टाकला. पोलीस आल्याचे पाहताच आरोपींनी कॉम्प्युटर आणि लॅपटॉपमधील डेटा डिलीट करून पुरावे नष्ट करण्याचा प्रयत्न केला. मात्र, पोलिसांनी तातडीने सूत्र फिरवून आरोपींना ताब्यात घेतले. या छाप्यात १७ तरुण आणि ४ तरुणी संशयित म्हणून आढळून आल्या.लाखोंची रोकड आणि मुद्देमाल जप्तया धडक कारवाईत पोलिसांनी तब्बल ३५ लाख ३४ हजार रुपयांची रोख रक्कम, अनेक हायटेक लॅपटॉप, महागडे मोबाईल आणि अमेरिकन नागरिकांचा मोठा डेटा जप्त केला आहे. या कॉल सेंटरमधून दरमहा २० लाख रुपयांपेक्षा जास्त उलाढाल होत असल्याचा प्राथमिक अंदाज आहे. अमेरिकन नागरिकांचे मोबाईल नंबर या टोळीकडे कसे पोहोचायचे आणि डॉलरचे भारतीय रुपयात रूपांतर करण्यासाठी कोणत्या हवाला मार्गांचा वापर केला गेला, याचा सखोल तपास पोलीस अधीक्षक निखिल पिंगळे यांच्या मार्गदर्शनाखाली सायबर सेल करत आहे.