नाशिकमध्ये मन सुन्न करणारी घटना! खेळता खेळता १ वर्षाची चिमुरडी बाथरूममध्ये गेली अन् पाण्याच्या बादलीत पडून दुर्दैवी अंत

नाशिक: घरात खेळता खेळता अचानक बाथरूममध्ये जाणे आणि तिथे पाण्याने गच्च भरलेल्या बादलीत डोकावणे एका अवघ्या एक वर्षाच्या निष्पाप बालिकेच्या जीवावर बेतल्याची अत्यंत वेदनादायी घटना नाशिकमधील आडगाव परिसरात घडली आहे. हिंदवी दत्तात्रय भोसले (वय १ वर्ष, रा. भोसले मळा, आडगाव फाटा) असे या दुर्दैवी मृत पालिकेचे नाव आहे. अवघ्या काही सेकंदांच्या अनावधानाने घडलेल्या या घटनेमुळे संपूर्ण आडगाव परिसरावर शोककळा पसरली असून लहान मुलांच्या सुरक्षिततेचा आणि पालकांच्या सतर्कतेचा प्रश्न पुन्हा एकदा ऐरणीवर आला आहे.

कुतूहलापोटी बादलीत पाहिले अन् तोल गेला
पोलिसांनी दिलेल्या माहितीनुसार, दुपारी दोन वाजेच्या सुमारास १ वर्षाची चिमुरडी हिंदवी आपल्या घरात खेळत होती. खेळता खेळता तिचे लक्ष घराच्या बाथरूमकडे गेले आणि ती रांगत किंवा चालत तिथे पोहोचली. बाथरूममध्ये पाण्याच्या वापरासाठी गच्च भरलेली एक प्लास्टिकची बादली ठेवलेली होती. हिंदवीने कुतूहलापोटी त्या बादलीत वाकून पाहिले असता, लहान असल्यामुळे तिचा स्वतःच्या शरीराचा तोल सांभाळता आला नाही. ती थेट पाण्याच्या बादलीत खाली डोकं आणि वर पाय अशा अवस्थेत पडली.

डॉक्टरांनी घोषित केले मृत
काही वेळाने घरातील सदस्यांच्या लक्षात आले की हिंदवी आजूबाजूला दिसत नाही आहे. त्यांनी शोध घेतला असता ती बाथरूममधील बादलीत पडल्याचे दिसून आले. तिचे वडील दत्तात्रय भोसले यांनी तात्काळ तिला बादलीतून बाहेर काढले आणि बेशुद्ध अवस्थेत उपचारासाठी आडगाव येथील वसंतराव पवार मेडिकल कॉलेजमध्ये दाखल केले. मात्र, तिथल्या डॉक्टरांनी तिला तपासताच उपचारापूर्वीच मृत घोषित केले. या धक्कादायक घटनेमुळे भोसले कुटुंबावर दुःखाचा डोंग कोसळला आहे. याप्रकरणी आडगाव पोलीस ठाण्यात अकस्मात मृत्यूची नोंद करण्यात आली असून पोलीस पुढील तपास करत आहेत.

पालकांसाठी अत्यंत महत्त्वाची सतर्कता:
अशा दुर्घटना टाळण्यासाठी पालकांनी घरात लहान मुले असताना विशेष काळजी घेणे गरजेचे आहे:

बाथरूमचा दरवाजा नेहमी कडी लावून बंद ठेवावा, जेणेकरून मूल तिथे जाणार नाही.

वापरात नसताना बादल्या, टब किंवा पाण्याचे ड्रम नेहमी रिकामे करून आणि पालथे (उलटे) करून ठेवावेत.

मुले घरात खेळत असताना त्यांच्यावर सतत एका व्यक्तीचे बारीक लक्ष असणे अनिवार्य आहे.